Jowai: Ka JHADC da tyngkheiñ biang ko ya u Shellsing Langi kam u Waheh Chnong ka Ummulong hadien wa da chong pyrkhat ka Executive Committee ha ka 28-12-17 hei yatoh ka Bui (Report) wa phah u Dolloi ka Jowai Elaka hei yatoh wa ka Dorbar Chnong wa pynman ha ka 13-12-17 katkam wa da hukum ka Meghalaya High Court.
Ka JHADC da phah ko ya ka Show Cause Notice ha ka 22-12-17 yow pynche u Shellsing lada em u ki daw wym hoi u pynhiar chuki ya oo kam u Waheh Chnong wei da phah won ya oo leh wow wan dei bru ha ka 29-12-17 yow pynche u ha khmat ka Executive Committee.
Ha ka 28-12-17 u Shellsing won da paan por u neidaw wa chitom u heiwa ha ka Medical Certificate wa e u da thoh wa chitom u na ka Respiratory Tract Infection wei emkaam 15 sngi yow pyndep yei sumaar.
Ka Executive Committee hadien wa chong pyrkhat ko ya ini i paan por, da rai ki wa ini toh i pyrchang wow pynslem chooh chooh ya ini i kaam heiwa da yoh yutip ki leh wa u Shellsing lai kreh hi u wei pyndep hi u ya ki kaam samen yong oo wa man ka sngi. Kamtæ ka JHADC da rai ko wow lai cha khmat hei yatoh wa ini i kaam.
Katkam ka Bui wa da phah u Dolloi wei hadien wa da sylli bha ka Executive Committee ya ki Video wa riñ ha ka sngi man Dorbar ha Ummulong, da chem wa kamwa 75% kiwa chong chnong ym em de chaniah ki ya u Shellsing kam u Waheh Chnong wei i pteiñ yong oo kam u Waheh Chnong daw ktah ko yei chong suk chong saiñ ka chnong wa ki kaam chnong.
Kamtæ katkam ka aiñ ka JHADC, ka Executive Committee da chim ko ya ka rai wow pyndam noh ya u Shellsing Langi kam u Waheh Chnong ka Ummulong chisyndon.
Neiliang u Shellsing won da ong u wa ka Meghalaya High Court da pynksan ko yei man Waheh Chnong u wei ka JHADC ym em bor ko wow pyndam ya ka hukum ka High Court wei oo hi u pteiñ u kam u Waheh Chnong hadooh ka 07-02-18 katkam i hok yong oo.
Discussion about this post