Ka sorkar jylla ynne da tynyap ko ya ka aiñ Meghalaya Regulation of Gaming Act 2021 hadien wa da pynmih ya ka Ordinance da u Lat ka jylla ha ka 31-12-22 yow pyndam ya kani ka aiñ neidaw wa ha itu i por ym em yoh u pynman dorbar.
Kamtæ yow pyndep ya waroh ki kyndon wow tynyap ya ka aiñ, da wanrah noh da ka Meghalaya Regulation of Gaming (Repeal) Bill 2023 yow pyndep yeini hapoh ka yung dorbar chna aiñ.
Neiliang u Montri ka chnat Taxation, u Abu Taher Mondal da pyntip u wa ka kyndon (Clause 3) wa da wanrah hapoh kani ka Bill toh yow khanglaad ya kiwon kiwon wow leh pyrchah ya iwa da jied ka sorkar wow leh yow pyndam noh ya kani ka aiñ kamjooh ki rai wa da dep chim heipor wa krehkaam kani ka aiñ.
Yeini da pynche u Montri yeiwa da kwah u MLA ka Nongkrem, u Ardent Basaiawmoit wow pynkylla ya ka kyndon wa da pyndam ya kani ka aiñ deiwa kylli leh iyi wow jia ya kitu kiwa da yoh ya ki Provisional License wow pynkrehkaam ya ki thaw yakhle hapoh kani ka aiñ heiwa u Montri da pynche chooh chooh u wa kini kiwa yoh ya ka Provisional License da kut noh i por krehkaam ko wei ki 3 ngut kiwa yoh ya kani da em arngut kiwa da pyndam leh ya ka Bank Guarantee ki wei dang sah sa uwi uwa daw pyntip ka sorkar cha oo wow sai noh ya kani ka Bank Guarantee.
Hadien wa da yoh ya ini i pynche wa kini kiwa da yoh License ym ye de ki wow pynemkaam ka, neiliang u Ardent da hun u yei pynche wei da pyndam noh u yei dawa yong oo wow pynkylla ya ki kyndon pyndam ya kani ka aiñ.
Kamtæ ka yung dorbar da pdiang ki wow tynyap noh ya kani ka aiñ yakhle.
