15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Tyrchaaiñ ka ri-loom Jaiñtia du naki 4 ngut

0 Comments

Jowai : Iwa sñiawsarong ya ka ri-loom Jaiñtia ha uni u snem heiwa soo tylli ki skur, le tylli na Jowai wa kawi na Changpung da mih pyrtuid ki khynnah yong ki kiwa poi chaphrang deiwa em pyrtuid ki ha ka First Twenty Candidates deiwa yoh ki yei kyrdan wa 4, 5, 7 wa 12 naki 51067 ngut ki khynnah wa yaleh ya ka Exam SSLC wa da pynman da ka MBOSE.

Ha ki kyrdan wa 4 da yoh da u Avantgard Nongpluh uwa lai skur ha North Liberty Higher Secondary School, Jowai. U Avantgard toh u khon ka kong Hunbait Nongpluh wa u ma Aiban Swer kiwa sah ha Chutwakhu, Jowai.

avant

Uni u khynnah ka North Liberty da yoh u 94.33% heiwa da yoh distinction u haka English-86, Khasi-90, Mathematics-100 wa man leh ki Highest Marks, Science & Technology-96, Social Studies 95 wa Health Education-99 hawa waroh deilang da yoh u 566 marks.

Hei yaklam wa u Principal ka skur u R. Uriah ong u wa uni u khynnah toh nadooh wa sdang skur da em u ha North Liberty wei ha kiwa boon hi ki snem da yoh Scholarship u naka skur iwa mut lait u wow su bai skur chi snem hadien wa man u uwa yoh nyngkong bait ha kiwa boon ki exam.

Hei kyrdan wa 5 da yoh da ka Evada-E-Hun Wann na ka skur Khad Ar Nor Secondary School, Changpung tangwa neidaw wa toh ka skur yong ka toh kawa ym pu em yoh Affiliation wa ka MBOSE kamtæ ha ka result da booh yaka kam ka Private Candidate tangwa ka skur toh kawa da tipmit da ka MBOSE.

eva

Ka Evada toh ka khon ka kong Refinement Wann wa u ma Ebortre Suchaing uwa man leh u Principal ka skur wa puræ ko.

Da yoh distinction wei Highest Marks ko haka Mathematics-100, ka Health Education-100. Da yoh distinction ko leh ha ka Khasi-93, Science & Technology-99, Social Studies-98 katwa ha ka English da yoh ko 75. Waroh da yoh ko 565 marks wei ka percentage ko da poi i 94.16%.

Ha i kyrdan wa 7 da yoh da ka Lis Syrti na ka skur St. Mary Mazzarello Girls’ Higher Secondary School, Jowai. Ka Lis toh ka khynnah khonswet ka wa na chnong Jalaphet wei sah yung wai ko wa ka wa em yatoh ko ha Jowai.

lis

Ka Lis katkam i ong ka Principal ka Sister Esther Maweiñ da ong ko wa kani ka khynnah toh kawa emsalon wei wa chongchit ko u chim bynta ha waroh ki yakop quiz, debate, sports wa kiwi kiwi weiwa ymjooh em mih katwa em iwa sih pyrchah yaka nadooh wa sdang ko u lai skur heini.

Ki marks ka Lis manki kamni næ Health Education-100 (Highest Marks), Khasi-90, Mathematics-98, Science & Technology-98, Social Studies-96, English 78. Waroh ki marks ko da poi 561 wa ka percentage ko 93.50%

Hei kyrdan wa 12 da yoh da u Wamehi Suna naka skur Govt. Boys’ Higher Secondary School, Jowai. U Wamehi toh u khon yong ka kong Happy Rose Suna kiwa sah ha ka chnong Mukhla. U Wamehi man ka sngi beh skur u na ka chnong yong oo cha Jowai.

wamehi

U Wamehi da yoh u ha ka English-78, Khasi-91, Mathematics-94, Science & Technology-98, Social Studies-97, Health Education-98. Waroh ki marks u da poi ki 556 wa i percentage u 92.66%.

Neilaing u Wyrta e khublei i yakini ki soo ngut kiwa da wanrah yei naam i pyrtuid ka ri-loom Jaiñtia chaphrang weiwa u Trekirod u dang kyrkhu u yaki wei kamjooh leh ya kiwi kiwow bood ya ki dak-kjat yongki hadien habood.

Previous
Next

0 Comments

Leave a Reply