theme-sticky-logo-alt
theme-logo-alt
Advertisement ad1
Advertisement ad1

U-19 Cooch Behar Trophy: Jop ka Meghalaya khlem da yooluti ya ka Arunachal

Ka Meghalaya ynne da lait ko na i kti chah pynrem ha ka Arunachal Pradesh yow jop da chi Wicket ha ka U-19 Cooch Behar Trophy deiwa kdong Run.

Deiwa pteiñ ya ka Innings wa ar ha Bhubaneshwar deiwa yoh 91/6 na ka thong wa 223 yow jop, kiwa Bat cha tre ka Meghalaya da ye ki wow pynlait im wei wow pynjop yow yoh 4 Point wei da ini da yoh wa ar hapoh ka Plate Group hadien ka Arunachal kawa da rem dang chisien.

U Rohit Yadav, uwa da pteiñ na ka 19 Run yong oo wa ynnin, da neh u sa 57 bol tangwa da ye u wow kamai du 7 Run donhi. Kamtæ da kit da bah won da u Manish Sharma (51) wa u PM Santhosh (61 Not Out), kiwa waroh ar da lehbha ha kani ka samoi kiwa da pynyoo biang yeiwa ye ki u wow leh da ka Bat.

Deilang da kamai ki 55 Run neibynta ka Wicket wa 8 yow pynpoi ya ka Meghalaya cha 178, tangwa dang emkaam sa 45 Run yow jop. U Santhosh da yoh u chiboon i kyrchaan na u Navin Kumar Ray (3 na 35 bol) wa u Gavineal Marpna (2 na 13 bol) kiwa da yieñ pyrchah yow ye u Santhosh wow kamai ya ki Run wa emkaam.

U Ray da haap u heipor wa yoh 196 deiwa sah sa du chi Wicket. Kamtæ ym em thaw wow bakla deiwa pynrkhiñ kiwa kawang bol ka Arunachal khlem e mynkna ya ki run, iwa mut wa u Santhosh wa u Marpna hap ki wow leh da ka Bat.

I jop dapoi i hadien wa dep baam ja sngi iwa man iwi na i jop wa sahkynmoo dooh ya ka Meghalaya ha uni u snem. Ini da man ko leh ka yaleh wa khaddooh ya ki U-19 heiwa da jop ki le sien. Ka Meghalaya da sdang ko ya kani ka Tournament deiwa rem chwa arsien.

Share this:
Previous

Jop ka Lama wa ka Lakadong Umlatdoh ha ka lympung yalehbol ka ELSA

Next

Pynmih kyndon yada COVID-19 sa ka jylla Goa