theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1
Advertisement ad1

U-23 Boys Cricket Tournament: Psiah Final ka Tura, yoh nyngkong ka Ri-Bhoi ha Group B ka Zone 1

Advertisement ad1

Ka Tura District Cricket Association da psiah Final ko ha ka U-23 Boys Inter District Cricket Tournament wa pynman da ka MCA deiwa jop la le sien ha ka Zone 2 ha Mendipathar, North Garo Hills ynne ka sngi.

Ka Ri-Bhoi won da yoh nyngkong ko ha ka Group B ka Zone 1 wei daw yachem ko wa kawa yoh nyngkong ha ka Group A ha ka 21 tarik yow yaknieh pisah Final.

Ka Ri-Bhoi ynne ka yachem ko waka East Khasi Hills ha Nongkhrah, Ri-Bhoi wei da jop ko da 140 Run. Chwa ynne, waroh arliang da jop ki mar arsien wei da emkaam ki u jop yow yoh u yakhun yaknieh psiah Final.

Ka EKH da jop ko ya ka kylla khlem wei da jied ko wow kawang bol nyngkong heiwa ka Ri-Bhoi da kamai ko 274/7 na ki 46 Over wa hoi u Bat. Uwa sdang yei Bat uwa yoh leh yei Man-of-the-Match, u Deekreat Nath da dat u 3 tylli ki 6 Run wa 11 tylli ki 4 Run yow kamai 97 Run na ki 125 bol katwa u Laxman Gurung da yoh u 62 na 53 bol (7×4, 3×6). Ka EKH da pynemkaam ko 7 ngut kiwa kawang bol heiwa da lehbha u Shongdorlang Shangpliang (2/54) katwa kiwi da yoh ki mar chi Wicket samen.

Ka EKH hawa kdong yei thong da yoh ko 134/10 na ki 37.1 Over deiwa kamai boon dooh u Wankitlang Nongpluh da 36 Run. Ya ki Wicket ka Ri-Bhoi da yoh u pynhaap boon da u Banialam (3/22) wa u Sadashiv Prasad (3/42).

Ha kawi won ka yalehke, ka Tura da jop ko ya ka South Garo Hills da 5 Wicket. Ka SGH kawa da rem chwa la arsien, da Bat nyngkong ko hadien wa jop ya ka kylla khlem tangwa da kamai ki 115/10 na ki 37.2 Over. Le ngut kiwa Bat da yoh ki wow kamai palat 10 Run deiwa yoh boon dooh u Richard N Sangma 28 Run. Da ka bol, u Banang Marak da yoh u 3/15, wa u Man-of-the-Match u Aniket Basfor 3/17 wa u Manish Sharma 2/32.

Uwa Bat ka Tura u Pringstar S Sangma da dat u 4 tylli ki 6 Run yow kamai 43 Run na ki 38 bol heiwa da yoh yei jop ha ka Over wa 23.1 deiwa dooh 5 Wicket wa pynhaap da u Jangrik, u Markush R Sangma, u Sundaybirth K Marak, u Quebirth M Sangma wa u Demesa R Marak.

Mynstep, ka Shillong Cricket Association A wa B daw yachem ki yow jied ya kiwa yoh u yachem waka Ri-Bhoi haka Zonal Final. Ka SCA (A) wa SCA (B) da jop ki ya waroh ar tylli ki yalehke. Ha ka Zone 2, ka North Garo Hills waka East Garo Hills daw yachem ki hanla ym yoh de ki wow psiah Final.

Share this:
Previous

Beh ka HNYF ya arngut ki baar jylla na chnong Nartiang

Next

Women T20 Challenger Cup: Jop ka Umiam yaka Myntdu