Kiwa yahkhmat ka United Democratic Party (UDP) wa kynthup nadooh u President, u Metbah Lyngdoh uwa man leh u Montri sorkar, u Secretary, u Titos Chyne uwa man leh u MDC ha KHADC, u MLA ka Mowkaiaw, u Nujorki Sungoh deilang ki MLA wa MDC warim na Khasi wa Jaiñtia Hills da hiar ki cha Jowai ynne ka sngi yow paan kyrchaan neibynta u kyrtong MP yong ka Party, u Vivant G Kynta ha ka yalang wa da pynman ha Community Hall ka dorbar chnong Tpep Pale.
Ha kani ka yalang kiwa yahkhmat da pynche ki ya ka yurim yong ka Party wa kamjooh leh ki bynta yong ka haka saiñ hima sima kamwa man ko kawi na ki seiñ ri-loom wa da rim bha.
Ong haroh ki wa hanla em i khih phaloh ka saiñ hima sima ha kini ki sngi khamtam ka khubor wow psiah BJP ki MLA ka UDP, tangwa ka Party won dang khlan ko wei ym em iyi iyi i chah ktah neibhah wa ki bru wa kyrchaan yong ka toh kiwa maya seiñ tre ri wei skem ka yurim.
U Titos Chyne ong u ka Politics ym jooh kylla ko tangwa toh ki bru hi wa kylla ya ka yurim, heiwa klam ki cha ki paidbah deiwi wei leh won ki deiwi neibynta i myntoi samen deiwa mylliñ noh ya ki yurim wa da lai ki cha ki paidbah.
U Titos yaroh u leh ya ki kaam u Vivant G Kynta kam uwa yasaaid aiñ neibhah heipor wa yakrehlang ki ha KHADC heiwa ym em kawi leh ka Case wa rem ki.
Neiliang u Nujorki Sungoh hawa paan kyrchaan na ki paidbah, ong u lada u Vivant G Kynta jop u ha kani ka MP Election daw yakhun u hapoh Parliament kamwa yakhun Case ha High Court itæ yow jop bait.
U Metbah Lyngdoh hawa klam ong u em kiwa yahbakla wow ong wa ka UDP da lai psiah BJP ko, hajrong ini ong u, oh-hoh ka UDP u neh ko ka Party UDP hi, wot lada hap lai yakrehlang ko wa kawon kawon ka Political Party ha kawon kawon ka por wa emkaam.
Ong u kani toh ka yurim ka Party wei ym em leh kawon kawon ka rai kiwa yahkhmat u lai psiah wa kiwi won ki Party. Wei lada kiwon kiwon kiwa mihkhmat kiwa rai lai psiah katæ toh ka rai yong ki hi samen ymtoh i yong ka Party.
Neiliang u kyrtong, u Vivant G Kynta hawa klam ong u i thmu ki National Party u wan psiah khlieh cha kani ka jylla toh wa em i thmu ki cha lyndet neibynta u yoh khloh Uranium.
Phla haroh u wa da jooh ngop u teiñ teiñ hei tyrwa buit tooh ka BJP, heiwa da hap yait noh u wei rai u maya ya ka seiñ tre ri hi.
Chooh chooh ong u wa da em i kular thok pynbiej ka BJP deiwa ong wa lada wan psiah phi cha i u pynyoh tipmit noh ya ka ktien Khasi.
Hajrong ini ong u wa u Amit Shah ym em bor u iyi iyi wow e hi-eh ha ka pliang ya katæ ka ktien Khasi neibynta u thap hapoh ka 8th Schedule, tangwa emkaam u yoh i mynjur wa kyrpang iwa mut 3 pawa na i em ki dkhot hapoh Parliament neibynta u pynpsiah næ tipmit ya kawon kawon ka ktien.
“Ini ymtoh iyi iyi wow e hi-eh ha ka pliang deiwa ong wan cha i yow e i ya phi kani,” pynrap u Vivant G Kynta.
Discussion about this post