Ka sorkar jylla da kyntait ko wa lai lait ko ya ki kyndon khamtam hawa yatoh wa ka mariang wow e bor ya ka Shree Cement Ltd. wow wan seiñ ya ka karkhana pynmih khyndaw-bilat ha Elaka Nongkhlieh, East Jaiñtia Hills.
Hawa jubab hajrong iwa kylli, u Montri Rangbah ka jylla, u Conrad K Sangma da ong u wa ymtoh iwa sakhiat kamwa da pynbaad, tangwa ka sorkar da bood ko thij pa thij ya ki kyndon, wei neibynta kawon kawon ka Project karkhana da booh ya ki kyndon wei ym ye wow man wa ka sorkar u lai lait ko ya kitæ ki kyndon khamtam hawa yatoh wa ki karkhana kiwa heh.
Da ong wa ym mih i yukylli wa em i lehbor næ tyngkheiñ kyndon, wei lada sñiawkhia ki paidbah, ye ki wow mih chakhmat yow pynsñiaw, tangwa ka sorkar da klam che ko wa ym em i lai lait ya kiwon kiwon ki kyndon neibynta kawon kawon ka Company.
Hawa kylli chooh chooh, u Conrad da ong u wa ym em leh i yachah chiliang ya kawon kawon ka Company, tangwa neibynta ka sorkar ki kyndon hap bait wow bood lada ki karkhana kiwa kammon kammon leh.
Neiliang u Symbood Montri Rangbah uwa pait ya ki kaam karkhana, u Sniawbhalang Dhar da ong u wa ka sorkar dang bichaar wei u man ko kawa yaichah yow ap yeiwa dawa ki paidbah hajrong i e bor ya ka Shree Cement Limited ha East Jaiñtia Hills.
Da ong u wa kam ka sorkar daw ap ko yei dawa ki paidbah neibhah katkam i pynsñiaw yong ki dang man iwa emkaam wow bood ya ki kyndon heiwa da em i tkoh hajrong ini wei neiliang ka sorkar daw pyndep ko yei dawa ki paidbah wow pynbiang katkam ka aiñ.
Discussion about this post