U MDC ka Saphai Constituency, u Habahun Dkhar hawa e yei klam haka yalang wa da pynman ha Mowkaiaw kam chibynta ka yalap Election MP neibynta ka kyrtong ka NPP, ka Dr. Ampareen Lyngdoh, da kyntu u ya kiwa kyrchaan ya oo wow kreh chitom ki neibynta yong ka kamwa kreh chitom ki neibynta yong oo heipor Election.
Da ong u wa ka NPP kam kawa em ha ka sorkar sñiawthooh hi wa hap wow chah pynbaad tangwa deiwa chah pynbaad chei wym toh, da sñiaw kamwa klam beiñ yaka Party da kiwa ka’ang cha luti syngkieñ, cha yaaw cha haat khamtam u Prah.
Da ong u wa ini waroh toh ki klam yaaw donhi deiwa e nongmuna ya u President ka VPP, u Ardent M Basaiawmoit uwa da dep phet na kawi ka Party cha kawi ka Party.
“Ha u 2008 jop u na ka UDP, ha u 2013 da yaleh u na ka HSPDP wei ha u 2018 da yaleh biang u naka HSPDP tangwa rem noh u wei ha u 2023 da yaleh u na ka VPP wei heipor wa em ha UDP man u kam uwi na ki rangbah wa heh tam, ha ka HSPDP leh kamjooh tangwa da ieh lut u ki wei katni da em u da ka VPP,” da ong u Habahun.
Hajrong ini da ong u wow kynmoo wa uni u bru ha ki san snem wow wan daw yaleh Election u na kawi won ka Party ymtoh dei na VPP neibhah uwa khlan kylliang Party na kawi ka por cha kawi ka por.
Ha iwi won i liang da ong u wa da toh u mylliñ yeiwa ong u thap para Jaiñtia neibhah lada leh kamni hap wow sñiawthooh wa ka Party wa yaleh u Vincent Pala ym em luti de ya ka wow wanrah ko yei myntoi neibhah kiwa yahkhmat hapoh Delhi leh ym em de ki wei ymtoh wow jied ya kiwa mihkhmat wa chong cha kdong.
Kamtæ da ong u wa ka Ampareen toh ka kyrtong ka NPP kawa synchaar hapoh ka jylla wei kiwa ya kreh chi rong yow ye u lai yaklam cha Delhi yow wanrah yei myntoi hapoh ka jylla yong i wei lada jied ya kiwa mihkhmat kiwa daw chong kdong donhi daw man ko i dooh nong ya i neibynta ka san snem.
Discussion about this post