U Prestone Tynsong uwa man u Symbood Montri Rangbah ka jylla, da ong u wa i dawa pynkrehkaam ya ka ILP hadooh katni dang sahkut wa ka sorkar India, deiwa ong leh wa neiliang ka sorkar hadien wa da mynjur ya ka rai (Resolution) u booddien khlem chong ngiah hadooh wa kut wa hadooh wa da yoh ya ka ILP.
Hawa kylli, da ong u wa ym toh ka sorkar wa khlem leh ko iyi iyi næ ym em booddien, tangwa wot neiliang u Montri Rangbah ka jylla, u Conrad Kongal Sangma hawa yachem wa kiwa yahkhmat ka sorkar pyrdi man-i-por da pynkynmoo u ya ini i dawa ILP yong ka jylla Meghalaya.
Hawa yatoh wa i dawa yong ki seiñbhalang wow pyndam ya ka Citizenship Amendment Act (CAA), neiliang u Prestone da ong u wa kamwa man katni, ya ka jylla Meghalaya da pynlait nei pynkrehkaam ya ka CAA laitnoh du ha ki ‘European Ward’.
Da pyntip u leh wa neiliang ka sorkar jylla leh da dep thoh ko cha ka sorkar pyrdi wow pynlait lut ya ka jylla Meghalaya nei pynkrehkaam ya ka CAA.
