Ka Meghalaya Transport Corporation (MTC), hapoh ka sorkar jylla, ynne da ya soi soskular ko waka SpiceJet yow pynhær lieñsuiñ Delhi-Shillong-Delhi arsien chi tayaw kitæ ha ka sngi Monday wa Friday.
Kam wow pynkynmoo wa ka lieñsuiñ wa hær cha Delhi-Shillong wa Shillong-Delhi da dep sdang da ka sorkar jylla ha u 2020 deiwa pynemkaam da ka FlyBig.
Ka FlyBig da pynemkaam ko da ki lieñsuiñ wa tip kam ki Bombardier Dash 8 Q400 Aircraft kiwa chim wai ki na ka SpiceJet hi. Tangwa hadien won ka FlyBig da pynsñiaw ko yei daw wym ye de wow pteiñ hanla ka sorkar da pyrchang ko wow yaklam wow thooh laad yow pteiñ, kamtæ ka sorkar da pynkut noh ko ya ka soskular pynkrehkaam.
Kamtæ ka SpiceJet da wan ko chakhmat wow yaklam waka sorkar jylla yow pynkrehkaam noh da ka yow hær na Delhi-Shillong-Delhi dei bor yong ki hi katkam ki kyndon ka MTC.
Ka SpiceJet em ko 23 tylli ki lieñsuiñ Bombardier Dash 8 Q400 Aircraft. Wei kini hi ki jooh daw pynemkaam hawa hær na Delhi-Shillong-Delhi.
Ya ini da yooluti wow sdang ha u Thohlakhmi (Feb) 2023 wei ya ka soskular da ya soi deiwa sakhi lang u Montri Rangbah ka jylla, u Conrad K Sangma.
