U Montri Rangbah ka jylla, u Conrad K Sangma ynne da booh mooyurim u neibynta wow sdang kreh ya soo tylli ki kaam pynroi sor ha ka yalang wa da pynman ha Ward’s Lake Shillong wei kini kynthup ki yow chna yaka yaaw ha Polo Junction, ki Mechanised Multi-Level Car Parking ha Vivekananda Road, hajan Additional Secretariat wa ha Polo Commercial Complex, neitæ i chna pynmiat yaka Iewduh Market wei wow pynkhooid leh ya san tylli ki nan deilang i chna pynmiat ya ki rood ka Ward’s Lake yow booh dukan wa ki thaw lai kjat.
U Conrad hawa e yei klam da ong u wa ka sorkar kwah ko wow pynkylla dur yaka nongbah Shillong yow man ko katkam ka juk wa katni, kawa suk u im wei wow pynkyllooid ka leh heijooh i por.
Heiyatoh waka Iewduh da ong u wa ini toh iwa da dep pyrkhat bha wei da emkaam wow pynmiat noh ka yow man ko leh kam ka thaw wa khriñ ya kiwa uiñke wei yow leh yeini daw pynlut Rs. 15 klur. Wei kani u kynthup ko nadooh wow chna dooid, ki paikhana, ki thaw pynlang jhep, i booh bordiñ, i pynmiat ya ki yung deiwa phooh wa phieñ, u booh yei thaw chongdai deiwa kyllooid yow yoh myntoi kiwa dai, kiwa thied kamjooh kiwa uiñke suwari.
Neibynta ka Ward’s Lake daw chna da ka thaw lai kjat wa jrong 1.5-2 Km mar pyrchah ya kani ka nan heiwa daw em leh ki dukan, ki thaw chongdai, i thaw booh kari, ki thaw baam yow pynmiat yeiwa yoh kiwa uiñke suwari u maad kamjooh yow man ko kam ka thaw yachem bru.
Daw booh leh yaka Laser Show, ka Amphitheatre, ka Water Fountain wa kiwi de.
Yow pynkyllooid yaka sor Shillong won toh deiwa booh yaka Mechanised Multi-Level Car Parking kawa man ka thaw booh kari wa boon mala kawa pynemkaam da ki kor yow thap u sai ya ki kari wei yow leh yeini daw pynlut 90 klur neibynta 465 tylli ki kari.
Heiyatoh wa ki 5 tylli ki nan kiwa daw pynkhooid, kini kynthup ki ya ka Ward’s Lake, Malse Lake, Nirman Jheel, Memo Lake wa em ha Williamnagar waka Rangjokram Lake wa em ha Resubelpara.
Discussion about this post