Ha ka yalang paidbah ka NPP wa da pynman ha Jowai ynnin ka 3 tarik heiwa da emlang leh u National President ka NPP, u Conrad K Sangma da pynlait ya ki kular Election namo ka Election Manifesto neibynta ka Election MLA 2023 kawa da e pyrtuid “People’s Document- Vision 2023-28”.
Ki phang wa hakhmat ha kani ka People’s Document toh yow e kreh ya ki khynroo khyllood, i kyrchaan ya ki warep, kiwa sah cha palatsor wei da klam leh ya kiwa boon ki kreh wa da dep leh kiwa da kular chwa.
Iwi na kini ki kular thymme toh wow chna kreh yow yoh kreh 5 lak ngut khamtam ya ki khynroo deiwa pynchlur leh ya kitu kiwa seiñ khih, ki kaam uiñke suwari, i pynmih marbaam na ki mar rep, u pynchlur ya ki kaam Digital ha ki thaw wa em cha sor wa cha palatsor. U e sikai ha ki sap kreh deiwa chna ya ki Multi-Sectoral Skill Parks, wei wow lai yah cha ki karkhana wa ki thaw kreh yow pynsñiawthooh ya ki jait kreh.
Ka NPP u pteiñ ko leh wow pynchlur ya kiwa seiñ kreh deiwa booh ya ki PRIME Hub ha waroh ki Block lyngba ka PRIME Scheme.
Ka NPP u kyrchaan ko leh ya ki khynroo kiwa em yei sap ha ki yalehke Sport deiwa booh ya ki thaw yalehke wa ryngkat kyrdan wa ka pyrthai, u thooh ya ki khynroo wa em yei sap wei wow pynheh pynsan ki wei yeini toh iwa ye u leh deiwa e nongmuna wa hadooh katwon lai bait i pynman ya ka 2nd North East Olympic Games.
Daw booh leh ya 1,000 tylli ki Chief Minister’s Facilitation Centers ha ki chnong wa em cha jngai na sor yow pynjan ya i chakri sorkar cha ki paidbah wei yow leh yeini daw thung kreh da ki bru wow man kam ki Village Community Facilitators (VCFs). Wei lyngba kini, kiwa chong chnong ye ki wow yoh boon ki chakri cha ki paidbah nadooh ki PDS, Pension wei wow pynbait ya ki kaam wa thut u pynpoi cha kiwa toh u yoh myntoi.
Ka Party u pteiñ ko leh ya ka FOCUS wa FOCUS+ yow yarap ya ki warep. U Yarap leh wow pynpoi yaaw ya ki mar rep, u kit u bah ya ki mar wei wow pynyoh yei dor wa biang tam. Kini kiwa dadep leh chwa da wanroh ko yei jop chwa heiwa ki warep chirmit Lakadong da em 13,000 ngut wa da yoh myntoi katni kiwa em du 1,000 ngut san snem nachwa.
Da kular leh wow chna ya ki sarok wa bha wa miat wa neh slem kamjooh ki yingkieñ yow pynyabi ya waroh ki chnong deiwa wanrah ya ka “Chief Minister’s Village Connectivity Scheme”.
Najrong kini, u pynbiang leh ya ka Internet ha waroh ki chnong wa em cha palatsor, u booh ya ki IT Park, u pynbiang umkor cha waroh ki yung, u pynku ya ka khayi pateiñ deiwa booh ya ki thaw khayi ha waroh ki District deiwa pynkrehkaam ya ka Industrial Policy wa thymme yow yoh kreh ki bru.
Heiyatoh wa i chait i khiah da ong wa ha kini ki 5 snem da dep pynku kyrdan ya kiwa boon ki thaw sumaar, da chimkhia bha yei chait i khiah ki manbei wa ki khynnah wei da pynkrehkaam leh ya ka Health Insurance Scheme wa da yoh myntoi bha ki bru ha kini ki 5 snem.
Daw wanrah leh ya ka Chief Minister’s Affordable Drug Centers kiwa dang thymme yow yoh ya ki dawai hei dor wa duna neiynta ka Meghalaya.
Najrong wow pteiñ ya kiwa boon ki Scheme wa dang krehkaam deiwa pynbha pynmait ya ki wa ki Scheme wa thymme daw pynman ya ka Meghalaya wow man ko kam kawi na ki Top 10 State hapoh ka ri.