Ynne ka sngi man ko ka wow sahkynmoo ya ki paidbah na ki khynde chnong ka East Jaiñtia Hills heiwa u Montri ka chnat Bhalang ka jylla uwa man leh u MLA ka thaaiñ, u Kyrmen Shylla da wan booh mooyurim u wow chna thymme noh ya u sarok Rymbai-Borghat-Jalalpur Road (RBBJ) ha ka yalang wa man ha chnong Bataw heiwa da wan chimbynta da u MLA warim ka thaaiñ u Justine Dkhar, ki MDC ka JHADC, ki waheh chnong wa kiwi kiwi.
Kini ki 9 chnong kynthup ki ya ka Bataw, Umsatai, Lad Wahwapung, Pynurkba, Diensatlang, Umlyngsha, Lakadong, Umlakdoh, Lakadong Ummat wa ka Lad Lakadong.
Ka yalang ynne ka sngi da pynlai ya ka da u Onikson Sumer uwa man u Chairman ka chnong Bataw, heiwa da yoh ya ki kyntien pdiang burom na u Firmly Rymbai u Waheh Chnong ka Lakadong Umlatdoh.
Neiliang u Ajoymeson Lyngdoh uwa man u President ka JSU-Southern Border Zone ha kani ka sngi da wanrah u ya ka phang wa ong wa joor i baam-tooh hapoh ka chnat PWD heiwa da e ya ki Bill wa kynjoh da ki T. 60-T. 70 lak khlem i kreh won ya ki sarok ha kani ka thaaiñ wei da dawa u leh wow pynman takit hajrong ini.
I kreh uni u sarok wa jrong kamwa 30km toh iwa nadooh i bynta wa 8 Km hadooh ka 37 Km.
U BW Phira uwa man u SE ka PWD (Roads), Jowai Circle da khana u wa kani ka Scheme toh ka Rehabilitation of Damage Pavement including MBT of RBBJ Road heiwa da yoh ya ka poisa (Sanction) ha ka 8 tarik u Naikhynde 2022 ha i lut wa T. 23,93,50,000 lyngba ka RIDF.
Da khana u wa i kreh u kynthup i nadooh wow khloh ya u sarok warim wei u siang da u moo wei psiang kam uwa thymme heiwa daw chna ya ki dooid, ki Signboard wa kiwi kiwi wei i kmai u sarok u neh i kamjooh iwa 3.75 m.
U Justine Dkhar hawa e yei klam da ong u wa i wan yong ki paidbah na kylleiñ ka Constituency wow sakhi ya i booh ya u mooyurim pynyoo ko wa ki paidbah kyrchaan ki ya i kaam wa bha.
Da ong u wa ya u MLA ymtoh iwa suk wow yoh Scheme wei u Kyrmen Shylla da lai paan lai dem u hakhmat u Montri Rangbah wa u Montri ka chnat PWD wei kam ki paidbah ka thaaiñ emkaam ki wow sñiawngooh ki yeini. Da kyntu u leh ya ki paidbah wow kyrchaan biang ya u Kyrmen Shylla ha kani ka kynti khnang wow ye u wow wanrah ya ki kaam wa dang sahteiñ.
U Kyrmen Shylla kam u kongsan ha kani ka sngi da ong u wa em chiboon ki eh i khor wa da chem ki MLA ha ki sanphaw snem wa da lai katwa kamtæ emkaam wow burom ya ki kaam wa da leh ki neibynta ka pateiñ wa katni.
Da ong u wa hei manbru boon i duna, wei em ki por mylliñ kiwa mihkhmat ya ki kaam wa kyrpaad ki bru wei ki bru emkaam ki wow pynkynmoo ya kiwa mihkhmat.
Heijooh i por da ong u wa emkaam wow man kiwa yatylli khnang wow ye u poi cha ka thong wei emkaam yei yakrehlang yong warohlang.
Hajrong i ong wa thap Goal u ha ka Last Minute, neiliang yong oo da ong u wa kani ka Goal toh kawa khaddooh ha kani ka kynti neibhah da boon ki Goal kiwa da thap u chwa ini kiwa man ha i dur ki sarok wa da chna hapoh ka Constituency.
Da pyntip u wa ya ka Scheme pynpoi um ha ka chnong Bataw wa ki chnong wa marjan kawa tip kam ka Synrang Umlawe WSS hapoh ka JJM heiwa i kreh dang man iwa lai bait wei dang yang wow yoh sa ya ki kor Pump.
Kiwi kiwa da klam ha kani ka sngi kynthup ki ya u Hosting Pajat uwa man u Secretary ka chnong Bataw, ki MDC wa kynthup ya u Lomris Lyngdoh wa u Finelyness Bareh, u Dy. CEM ka JHADC u Lasky Rymbai kiwa da yaroh ya u Kyrmen Shylla wa ki kaam yong oo wei da kyntu ki ya ki paidbah wow jied biang ya oo ha kani ka kynti khnang wow ye chooh u wow wanrah ya ki kaam pynroi ha ka thaaiñ wa ka Constituency hi waroh kawi.
Neiliang u waheh chnong warim ka Bataw, u Bhalang Suchiang da e u ya ki kyntien khublei.
Ya kani ka sngi da pynphooh da i chaad na ka Village Organisation ka Bataw, wa i rwai na u Banker Kharkangor iwa pyrtuid Khublei Ma Kyrmen.
