U Deputy Chief Minister ka jylla, u Sñiawbhalang Dhar da pynbna paidbah u ar snem nachwa wow chna pynmiat ya ka madan Kiang Nangbah Stadium, Jowai hei lut wa Rs. 25 klur wei ynne ka sngi da wan pait biang u ya kani ka madan ryngkat u MLA ka thaaiñ, u Wailadmiki Shylla deilang ki Engineer na ka State Sports Council, ka PWD, u Asst. Director ka Sports & Youths Affairs uwa man leh u DSO ka WJH, u Khroobok Passah, ki dkhot ka WJDSA wa kiwi kiwi.
U Sniawbhalang Dhar hawa klam ynne ka sngi da ong u wa i wan pait toh wow sdang noh i kreh ya ka Gallery namo ka thaw chongke kam chibynta i pynkhreh ya ka National Games ha u 2027.
Hawa nujor u wa ka Wahiajer Stadium da ong u wa em i doohnong kajiak neibhah ha Jowai wa khynnia i thaw kamtæ ym yohsa wow chna katkam wa chah i thaw, tangwa i angnood u toh wow em Gallery wa biang ha waroh soodong wei chadien ki Gallery won u em ki thaw pynyieñ kari.
Chooh chooh iwa eh ha kani ka madan toh i thaw pynyieñ kari wa lada thmu wow pynman yalang wa heh leh man iwa khynnia kamtæ da hap wan pait biang.
Da ong u leh wa daw pyrchang thooh thaw wow chna sarok sa na iwi næ ar thaw wow psiah wow mih na kani ka madan khnang wa lada em ki yalang wa heh daw lait nei sahkut kari.
Neiliang u Wailadmiki da ong u wa nachwa em i angnood wow chna kamwa man ha Wahiajer tangwa chem chitom nei khynnia i thaw, hanla kattæ leh daw pyrchang ki wow chna pynbha pynmiat katwa chah i thaw.
Da ong u leh wa iwa sakhiat, i kreh da toh u sdang nadooh ki bnai wa dadep tangwa neidaw wa hap pynemkaam ya kani ka madan heipor ka Meghalaya Games da hap sangeh chwa.
U Wailadmiki da pynrap u leh wa kam u MLA hawa leh i ya iwon iwon i kaam wa kwah u, emkaam i mynjurlang ki bor pait bor pynlai khamtam ki bru wa ka’it u yalehke Sports kamjooh ki paidbah.
Discussion about this post