U chna ya ka New Shillong Water Supply Scheme hei dor wa Rs.1600 klur kawa heh dooh ha Meghalaya

U Montri Rangbah ka Meghalaya, u Conrad K Sangma ynne da booh mooyurim u ya le tylli ki kreh kitæ ka New Shillong Water Supply Scheme, ka Land Reclamation Project ha i thaw noh jhep ha Marten, Mawlai wei wow chna ya ki sarok chnong ha New Shillong Township ha Mawkhanu, Mawpdang.

Ka New Shillong Water Supply Project toh kawa chongdor Rs. 1600 klur wei man ko kawa heh dooh ka kreh umkor hapoh ka jylla hadooh katni wei na kani da em Rs. 500 klur kawa da dep pynlait wei yei kreh u pyndep 36 bnai.

Kani ka New Shillong Water Supply Scheme daw pynypoi umkor ko cha Shillong wa New Shillong Township wow kynthup ya ki thaw puræ, ki yung krehkaam wa 32 tylli ki chnong wa em 29,889 ngut kiwa sah. Wei u chna heitæ i rukom yow ye u pynbiang yeiwa emkaam ki 198,997 ngut ki bru kat ha u snem 2042 wei hadooh 413,701 ngut manda poi u snem 2057.

Ki sarok wow chna won ha Shillong Township toh neibynta ka Mawkhanu hei dor wa Rs. 185 klur, neitæ Rs. 343 klur wa kynthup ya ka Ummir cha Mawkhanu wa na Kynoton cha Lyngkien, na Bellefonte cha ka New Township, u sarok Diengpasoh cha Shillong Bypass wa u sarok Bribah Mawpat cha New Township.

Related posts

Kyntait ka Agatha Sangma wow man ka kyrtong MP cha Rajya Sabha

May 29, 2025

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

Ha ka Phase 2 kini ki sarok, u chna 16.6 Km uwa kmai 15m wei daw em leh 3.2 km u sarok 2-Lane uwa kmai 7.5m wei kini daw chongdor ki 185 klur. Kini ki sarok da yooluti u pyndep chwa u kut u 2026.

Heiyatoh waka Land Reclamation Project ha Marten, daw yaleh u pynkylla noh yei jhep cha ka spah deiwa chna ki hei dur ki tiar wa boon jait yow pynkhooid yei jhep neibhah kani ka thaw man ko kawa sñiawkhia da kiwa chong chnong.

U Conrad da ong u wa yeini u leh hapoh 12-18 bnai heiwa u pynklla ya kani ka thaw noh jhep kam i thaw paidbah wa ye kiwi chnong u pynbood.

Da ong u leh wa ka sorkar booh thong ko wow pynku yaka jylla cha ki kyrdan wym jooh poi ha kini ki 10, 25 hadooh 50 snem wei du ha kini ki 4 snem wow wan ha New Shillong Township daw em leh ka Knowledge City wei u man ko leh kam Administrative City wei ka mang poisa dapoi ko Rs. 10,000 klur wei na ini daw mih hadooh 50,000 tylli ki kreh.

Da khana u leh wa ka sorkar pyrdi da em ko i thmu wow sdang 8 tylli ki Township wa thymme hapoh ka ri wei da pyrkhat ko leh neibynta ka New Shillong Township heiwa daw yoh Rs. 500 klur neibynta ini.

Chooh chooh da ong u leh wa ini waroh iwa da leh ka sorkar toh yow poi cha ka thong kawa 10 Billion US Dollar Economy yow pynku leh yei yoh i kot kiwa chong chnong.