Ka BJP kam chibynta wow pynhun ya ki paidbah wow e ya ki Vote yong ki, da wanrah ko sa u Montri ka sorkar pyrdi wa pait ya ka Road, Transport and Highways, u Nitin Gadkari uwa da wan wow yalap Election ha ka 18 tarik ha Baghmara wa Ranikor.
Hawa e yei klam da ong u wa ha ki 75 snem wa da yoh wow man kam ka ri dang em ki thaw wym poi ka roi ka paar iyi iyi leh. Da em ki thaw wa tang kiwa sikai leh ym em ki wei em leh tang ki yung skur leh ym em ki kamjooh ka sarok leh ym em wow lai cha skur. Da ong u leh wa yow yoh yei roi i paar emkaam wow pynchlur ya ki karkhana wa ki kaam khayi pateiñ, wei kini leh emkaam ki ya ka um wa biang kamjooh ka bordiñ, ki sarok, ki kari kamai wa kiwi kiwi de.
Da ong u yow pynlait nei dooh i duk, emkaam wow em ki karkhana wa ka khayi pateiñ wow em ki deilang tangwa lym biang won ki luti syngkieñ wa kiwi de wa emkaam, ym ye ki karkhana u ku wei ki kaam ki jaam leh ym em ki. Kamtæ ka sorkar u Modi da chna ko ya ki sarok deiwa pynlut T. 3 lak klur ki wow pyndep waroh ha u 2024. Chooh chooh da ong u wa ki sarok ha North East da ku ki da 25% nadooh u 2014. Ki sarok National Highway wa chongdor T. 4000 klur da chna ha ki 351 tylli ki kreh.
Da khana u leh ya ki sarok wa dang chna kiwa da jan dep wa kiwa daw chna kam ka Ranikor-Baghmara wa jrong 130 Km kawa chongdor T. 1300 klur ka wow pyndep chwa u Naichiphaw 2024.
U sarok Nongstoin-Wahkaji 43 km hei lut wa T. 302 klur ka wow pyndep ha u Naisaphar 2023. U sarok Nongstoin-Kirshai 33 Km hei lut wa T. 360 klur u wow pyndep ha Naisan 2024. Ka yingkieñ ha ka wah Rongdik ka wow pyndep ha u Naiynru 2023.
Ha West Jaintia Hills daw pynchna pynmiat ya ka kchaaid Krang Suri Falls. Da pynkhreh ya ka DPR ya u sarok na Mawryngkneng cha Jaintia Hills wa jrong 127km uwa 4-Lane Road hei dor wa T. 4850 klur u wow pyndep chwa u Naichiphaw 2023. U sarok Dawki-Jowai 15 Km hei lut wa T. 43 klur u wow pyndep ha u Khonchonglad (Nov) 2023.
Ka DPR da pynkhreh 78 Km Shillong 4-Lane Bypass hei lut wa T. 3561 klur. Da em leh ka DPR wa da pynkhreh yow chna ya u sarok 40 Km 4-Lane East Bypass hei dor wa T. 1500 Klur u wow pyndep ha u Naichiphaw 2023. Da em leh ka DPR yow chna ya u sarok 38 Km 4-Lane West Bypass hei lut wa T. 2061 klur u wow pyndep ha u Naitung (Apr) 2023 wei uni daw pynkyllooid u leh ya ka sor Shillong neibynta ki kari wa wan na Guwahati.
U chna leh ya ka sarok Shillong-Dawki 44 Km hei lut wa T. 970 klur u wow pyndep ha u Naitung (Apr) 2024 wei uni daw pynsuk u ya kiwa uiñke suwari kiwa lai cha ka wah Umngot.
Ha ki thaaiñ Tura daw chna ya u sarok wa chongdor T, 4350 klur na Dainadubi-Williamnagar 80 Km, ka Tura-Dalu 51 Km hei lut wa 553 klur, ka Tura Bypass hei lut wa T. 992 klur wei da pynkynmoo u leh ya ka yingkieñ ha ka wah Brahmaputra na Phulwari ha Meghalaya cha Dhubri Assam hei lut wa T. 5000 klur wei da kani daw pynduna i yei lai luti da 203 Km na Phulwari cha Dhubri.
Kamtæ da ong u wa ka India da lai ko chakhmat wow man kam kawa khlanbor ha ka khayi pateiñ wei ym leh chilliang ya kiwon kiwon deiwa pait ya ka niam, ki jaitbru lane chynrang næ kynthai.
