Ka seiñ kiwa yah Truck Tanker kawa pynpoi phñiang kari chapoh Meghalaya da rai ko wow dam noh u lai chapoh ka jylla nadooh ka 29 tarik uni u bnai (Nov) neidaw wa joor chah pyndik cha pynchitom ki ha ki pulit.
Ha ka chithi wa da thoh da kani ka seiñ kawa tip kam ka North East Petroleum Mazdoor Union cha u Montri ka Food Civil Supplies & Consumer Affairs Department da ong wa nadooh ka 24 tarik uni u bnai, ki pulit ka Meghalaya da pynchitom ki ya kiwa yah Tanker kit phñiang kamjooh kiwa yarap ya ki hapoh Ri-Bhoi District nadooh na 18th Mile.
Da pyntip ki wa ki pulit da ksoh yabor ki ya kitu ki Tanker kiwa da sangeh yow baam ja ha ki Dhaba wa em ha 22nd Mile wei da Register Case hi-eh pyrchah ya ki wei haka 25 tarik leh da kem ya kiwi de ki Tanker kiwa chah ksoh khlem daw iwa da ktah bha ya kiwa pynpoi phñiang chapoh Meghalaya.
Ini waroh da pyntieñ ko ya ki wow psiah chapoh Meghalaya neibhah wa da chah pyndik ki khlem daw tangwa da ong ki lada biang ka sabut wa leh bakla ki, ki leh ym ood ki wei u ya krehlang ki. Tangwa du wow leh donhi khlem daw du wow pynchitom ya ki bru ym ye ki u pdiang.
Chooh chooh da ong wa da pyntip kiwa yah Tanker wa manda wan pynbaad ki pulit, lada kyntait ki daw chah dat ki leh ha ki pulit kiwa da chondur leh ya ki wei ini waroh i psiah chapoh Meghalaya da booh ko hei maa ya kiwa kit phñiang.
Kamtæ da ong wa lada ka sorkar ym ye ko wow pynsangeh ya ini waroh, nadooh ka 29 tarik uni u bnai u dam noh u kit phñiang wa mih na IOCL, BPCL wa HPCL kiwa toh neibynta ka Meghalaya.
Da pyntip leh wa kini ki wakreh yong ki ym em su cha ki da ki Dealer wa Transporter da ka nong Minimum Wage, DF, ESI wa kiwi wa toh u yoh myntoi ki katkam ki aiñ.
Discussion about this post