Shillong: U General Secretary ka BJP wa pait ya ki Scheduled Tribe & Scheduled Caste u Hayithung Bill Lotha da syllad u ya ka Congress khamtam ya u Montri Rangbah ka jylla u Dr. Mukul Sangma wa kam u bru uwa dap du i baamtooh.
Hawa klam ya kiwa pathai khubor ynne ka sngi ha Shillong, u Lotha da ong u wa u Montri Rangbah ka Meghalaya toh uwa baamtooh tam ha India uwa man leh du kam uwa pynbna paidbah ya ki scheme wei uwa chkeh wow pynbiej bru katwa ka kaam won cha khloo.
Da ong u wa wot ha ka contituency yong oo (Mukul), ki sarok boon kiwa dap thlu hanlada rah u ya waroh ka poisa paidbah ka jylla Meghalaya cha Ampati heiwa da ong u wa ki sarok PMGSY na Mawlangsu, Rambrai, Nonglang-Khanduli, Kyrshai kiwa chong dor da ki klur da pynemkaam bakla hi-eh wei ki sarok won du kiwa sap laphooh.
Da ong u wa ha u snem 2013, da chna u boon tylli ki district hapoh ka jylla tangwa ym em u krehkaam ki hadooh katni lait noh du yei booh SDO wa DC.
Da pynbaad u leh wa katni u Dr. Mukul boonkaam u katni du heiwow lai booh moo-yurim ha kylleiñ ki thaw ka jylla wow pynbiej paidbah khlem leh won iyi iyi ha kini ki soo snem tam.
Heijooh i por da kylli u wa cheiwon em kitæ ki Medical College kiwa da kular u heiwa hadooh katni wei ini pynyoo i wa ka sorkar Congress toh kawa khlem kaam kawa joor du i baamtooh donhi.
Hei yatoh won wei klam u Ronnie V Lyngdoh wa ka BJP daw pyndam noh ko ya ka bhah thungkaam ya kiwa khian paaid kam ki Schedule Tribe wa Schedule Caste deiwa ong wa ym em kam ini ha ka thong krehkaam ka BJP wei ka sorkar u Narendra Modi chimkhia bha ko wow pait kyrpang ya ki khian paaid wei ini i klam u Ronnie pynyoo ko wa oo man u uwa thok wa chyrkhei tam.
Discussion about this post