Ki dkhot ka Sohra District Demand Forum (SDDF) da jaaw ki slew neibhah wa u Montri Rangbah ka jylla, u Conrad Kongal Sangma ym pu pynbna u wa da e District ya ka Sohra, wot hadien wa da yang yooluti bha ynne i janmiet ka 5 tarik.
Neiliang kiwa yahkhmat ka Sohra District Demand Forum ryngkat ki khlieh synchaar ka thaaiñ Sohra da yang angnood ki ya u Montri Rangbah wa ya u Symbood Montri Rangbah ynne ka sngi wow pynbna noh ki wa da e District ya ka Sohra, tangwa i klam yong u Conrad da pynjaaw wei pyndiaw ya ki neibhah wym em pynbna.
U Conrad hawa klam ha ka yalang ha Circuit House ha Sohra da ong u wa emkaam wow phiah noh ya ka East Khasi Hills District wei da kular wow pynyoh ya ka District ha Sohra, tangwa i pynbna daw leh hadien wa dep u pynbait pynbiang lut ya kiwa emkaam waroh.
U Conrad da pyntikna u leh wa ka Head Quarter yong District wa thymme u man bait ha Sohra neibhah da biang i emkaam.
Hadien ini i klam yong u Montri Rangbah neiliang kiwa yahkhmat ka Forum wa kynthup ya u Chairman, u Atiar Syiemlieh wa u Allan West da paan pynche biang ki sa na u Symbood Montri Rangbah wei kamjooh na u Montri Rangbah kiwa da yieñ wow pynche biang ya ka daw wa ym pu ye u pynbna ya ka District kamwa man kattæ.
U Conrad da pynche u wa i bynta u jied ya u pood yong ka Sohra District toh iwa rap eh neibhah em boon ki riat ki synrang kam ha Sohra, Shella, Pynursla wa ki thaaiñ Dawki wei hawa chim ya ka rai toh u man ko kawa ym chah pynbaad hadien wa da leh bakla hawa chim yei rai ya kiwon ki chnong wow em hapoh ka Sohra District, kamtæ da ong u wa daw e hi ya ka Sohra District wei manda ye u pynbait ya waroh i jait wei ym em de i ood i khñium na kiwon kiwon ki liang yow suk ka mynried ka mankawi.
