Ka CM Solar Mission kawa man kam kawi na ki thong krehkaam yow pynemkaam da i bordiñ wa pynmih na ka sngi toh kawa da booh kyrpang u yoh myntoi ki bru wa dooh wa duk ka jylla Meghalaya.
Ka sorkar daw e ko leh ya ka Subsidy wa heh kamjooh i pynchlur ya ki Bank wow yarap ki hei dur ki ram wa suk u su kawa duna yei dor ka bai bordiñ.
Ka Subsidy u man ko hadooh 70% na ki manyung ki bru, 50% ya ki skur, Hospital, ki Hotel wa kiwi ki thaw khih, da pyntip u Montri Rangbah, u Conrad K Sangma hawa pynlait ya kani ka Scheme.
Kamtæ da ong u wa ki paidbah daw hap ki wow su du 10% donhi nei dor kini ki tiar hapoh kani ka Scheme yow yoh ya kini ki tiar Solar.
Da pyntip u leh wa ka sorkar u booh bhah ko T. 100 klur chi snem neibynta kani ka Solar Mission wei hadien wa da lai ko chakhmat daw khut wow ya krehlang wa kiwi ki Company.
Ini waroh u krehkaam i deiwa pynemkaam da ki Hybrid Solar Inverter kiwa ye u dyndap namo u Charge deiwa pynemkaam dei bor ka sngi kamjooh da i bordiñ wa pynemkaam ha yung tangwa toh u Charge oo da ka sngi hi yow yoh bordiñ heipor wa dooh bordiñ, wei u Charge u leh lada ha ka sngi wa boon lyoh. Ya uni u Solar Inverter ye leh wow pynemkaam heipor wa em bordiñ iwa daw pynduna bha ya ka bai bordiñ.
Em leh ki Hybrid Solar Inverter System kiwa heh bor bha kiwa ye wow pynman yei yung ki bru kam i thaw pynmih bordiñ heiwa ya ka bordiñ wa tam wa pynmih ye u phah chah ka chnat pynmih bordiñ wa chadooh ka National Grid.
U Conrad da ong u wa ka thong toh u em 30-40% ki manyung wa em ya kini ki Solar Inverter kiwa ye wow pyndap bordiñ 8-9 kynta chi sngi lada em i pyndooh bordiñ ka sorkar, kamtæ da ong u wa da yooluti wa ini daw yarap ko chiboon yei duna bordiñ.
Kam chibynta kani ka Solar Mission najrong ka Subsidy ya kini ki Solar Hybrid Inverter daw em leh ki Solar Water Heaters neibynta waroh kiwa chong chnong.
Kini ki Solar Inverter i bor ki toh nadooh 500 VA hadooh 40 kVA iwa ye u jied katkam i emkaam.
Discussion about this post