Ka sorkar jylla ynne ka sngi da mynjur ko wow e laad lai puræ pynpliah ya ki sahep sorkar kawa tip kam ka Mid-Career Sponsored Courses wa da kyrchaan poisa da ka sorkar, wei ini i thmu yong ka sorkar u man ko ya ki sahep sorkar kiwa ksoh ya ki kyrdan wa heh yow rap chemphang ki yow ye ki wow chakri rap bha chooh chooh ya ka jylla.
Hawa klam cha ki laad pathai khubor hadien ka yalang yong ki Montri sorkar, u Montri uwa man leh kam uwa e ktien ya ka sorkar, u Paul Lyngdoh da ong u wa da rai wa ka Mid-Career Sponsored Courses kawa man neibynta ki sahep sorkar yong ka All India Services, Meghalaya Civil Service, Meghalaya Police Service, Forest & Finance Services yow nang pynproh jabieñ wei wow pynjanai yei ye ki u chakri ya ka jylla toh kawa kongsan hei krehkaam hapyrdi ki bor synchaar saiñ pyrthai wa ki paidbah.
U Paul da khana u wa ka sorkar da rai ko leh wow pynchlur ya ki sahep yow nang pteiñ ki wow lai puræ pynpliah ha ki University waphær waphær kiwa e ya ki Degree wa Diploma Course kiwa rap heh kyrdan khlem da pyntkhoh won ya ki kaam wa kreh ki man-ka-sngi, iwa mut wa ym chim ki ya kawon kawon ka chuti ha i por wa dang em ki hei chah hikai pynpliah.
U Montri da khana u wa ka sorkar jylla da mynjur ko wow pynlut T. 15 lak chi snem neibynta wow kyrchaan poisa yei lai puræ ki sahep sorkar, wei neibynta ini da em leh ki kyndon wa ka sorkar da booh ko wei da pyntip u wa ka sorkar daw chna ko ya ka Committee wa daw khlieh da u Chief Secretary yow bichaar wei mynjur ya ki Application yong kini ki sahep sorkar.
Discussion about this post