I dawa ka United Democratic Party (UDP) wow pyndooh noh ya ka chnat Bordiñ na u James PK Sangma ym man kaam i neibhah wa katkam i klam u montri rangbah ka jylla, u Conrad Kongal Sangma wa ka sorkar ym pdiang ko yeini i dawa ka UDP, heiwa da ong u wa ki MLA da pynsñiaw ki wa ym emkaam wow wow pyndooh ya u James ya ka chnat Bordiñ.
U Conrad da ong u wa lada kam ini i dawa wan ki, ka sorkar u suki næ u pdiang bait ko, kammon won u pynlai ya ka sorkar wei da pynrap u wa hadien daw mih sa kiwi i dawa wa sa ya uni utai leh hap pyndam.
U Montri Rangbah da ong u wa lada em i sñiawthooh bakla, ka sorkar daw pynbait ko hapyrdi ki dkhot ka sorkar synrop neibhah wa neiliang ka sorkar dadep yaklam ko wa ki MLA wei lada emkaam daw yaklam leh wa ka Coordination Committee ka MDA ryngkat ki heh ka UDP.
Kam wow kdaw heini, ka UDP ha ka chithi wa soi da u General Secretary, u Dr. Jemino Mawthoh ha u Wisu da sdang dawa ko na u montri rangbah wow pyndooh ya ka chnat Bordiñ na u James Sangma, hajrong ka yurim wa ymye wow pynbait ya i eh i khoo wa mih hapoh ka chnat wei i pynkrehkaam ya ka Load Shedding.