Shillong: Ka sorkar jylla da rai wei da pdiang ko wow pynkrehkaam noh ya ka aiñ kiwa chongwai wa tip leh kam ka Meghalaya Resident Safety and Security Act 2016 ha ka 14 tarik uni u bnai.
Yeini da rai wei da pdiang ha ka yalang ki montri ka sorkar ynne ka sngi kamwa da kular u Montri Rangbah ka jylla ha ka yalang wa ki seiñbhalang.
Hawa yaklam wa kiwa pathai khubor u Dr. Mukul Sangma da ong u wa ki montri waroh da pdiang ki ya kani ka aiñ ka wow tip kam ka Meghalaya Resident Safety and Security Act 2016.
Da ong u wa kani ka aiñ emkaam bha ko heiwa da em ki kyndon wa ka sorkar da leh ko hadien wa kut ka yalang wa ki 13 tylli ki seiñbhalang.
“Ya kani ka aiñ da wanrah hadien wa ya phyllu yumut bha wa ki seiñbhlang kamjooh ki bru samen na ka imlang sahlang wei da pynjanai bha ya ka katkam wa da yaklam” da ong u Dr. Mukul.
Da kam u wa kani ka aiñ u man ko kawa biang tam wow sylli yei wan psiah be-aiñ ki bru na baar jylla wei ymtoh u sñiaw phylla hadien kiwi ki jylla ka ri daw chim kylliang ki ya kani ka nongmuna.
“I da leh i wow pynbait wow pynkylla yeiwa emkam hadien wa da dep phyllu yumut wa ki seiñ waphær waphær wei ynne ka sngi da ye u ong wa daw pynkrehkaam noh ya kani ka aiñ.” da ong u Montri Rangbah.
Ha i jooh i por da ong u wa kani ka aiñ daw e bor ko ya kiwa synchaar chnong wow pynemkaam lang ya kani ka aiñ dei krehlang wa ki bor sorkar.
Hawa kylli chaphang i dawa ka HYC ya ka Inner Line Permit (ILP), u Dr. Mukul da ong u wa ka ILP ym yahaap ko hawa pait ya kiwi ki jylla wa pynkrehkaam ya ka “Nga u ong u deiwa sñiaw skem wa ka ILP ym toh ka stieh wa biang wow yada yei wan ki baar jylla katwa ka aiñ chongwai ka sorkar toh kawa bha tam wow pait ya ini.” da kam u Montri Rangbah.
Da ong u leh wa kani ka aiñ chongwai ye ko u duna ha wah ha neiñ wei hadien wa pynkrehkaam ya ka daw chem ya iwa duna ko wei ka sorkar daw pynbiang ko ya ini waroh.
Discussion about this post