Ka Hill State People’s Democratic Party (HSPDP) kawa da dawa ya ka jylla Khasi-Janitia State wa ka Garo Hills State Movement Committee (GHSMC) kawa da dawa ya ka jylla Garo State ha ka tayaw wa da dep da pynman ki ya ka yachemlang.
“Nadooh nachwa da em ka ya krehlang hapoh i yahkhmat u President warim ka HSPDP u (L) Hoping Stone Lyngdoh wa u (L) Clifford Marak na ka Garo National Council (GNC),” da ong u working President ka HSPDP u K.P. Pangniang.
U Pangniang da ong u leh wa nachwa, ka HSPDP wa ka GNC da dep ki wow e ya dorkhat wa da ya soi lang yow phiah ya ka Meghalaya cha ka jylla Khasi-Jaintia wa ka jylla Garo.
Da pyntip u leh wa nachwa toh du ka GNC tangwa katni da dawa ya ka Garoland sa ka GHSMC.
U Pangniang da pyntip u wa hadien kani ka yalang wa da pynman ha Ri-loom Garo ha ka tayaw wa da dep, da rai wa ka HSPDP deilang wa ka GHSMC u ya krehlang ki yow lai chakhmat wow dawa ya ki jar jiar ki jylla.
Da khana u leh wa daw chna da ka Coordination Committee yow phah dorkhat cha ka sorkar India hajrong ini i dawa.
U Pangninag da ong u leh wa ka Coordination Committee daw yaklam ko ya kiwon ki thaw kiwa daw haap hapoh ka Khasi-Jaintia wa ka Garo.
Da kdaw u leh wa nachwa ki sieñ kieñ suloi na Ri-loom Garo kam ka ANVC wa GNLA da dawa ki ya ka “Greater Garoland”, wei kini kynthup ki ya ki bynta ka West Khasi Hills, Kamrup wa Goalpara District ka Assam.
Kamtæ da ong u wa ini i dawa ya ka Greater Garoland da wanrah ko yei kulmar ha ki Khasi wa ki Grao ha ki por wa nachwa heiwa katni da kwah wow tip bniah ya u pood wei ini ym em yatoh ko wa ki kaam seiñhima sima.
Da ong u leh wa nachwa da yaleh wow yoh jylla deiwa pait ya ka jaitbru of Khasi-Jaintia wa Garo wei ym toh ya ka jylla Meghalaya.
“Ki bru ha itu i por da mut ki jan i pyrtuid toh u man ko Khasi-Jaintia & Garo iwa sariem kam ka Jammu & Kashmir,” da ong u Pangniang.
Da kdaw u leh wa kiwa boon ki jylla hapoh ka ri man ki deiwa pait yei ktien wa klam ki bru.
Da ong u leh wa hapoh ka Article 29 (1) ka Constitution ka India da ong ko wa kiwon kiwon kiwa chong chnong hapoh ka ri India kiwa em ki yong ki hi i ktien, ki dak thok wa ka dustur riti toh u em ki yei hok wow pynneh pynsah ya ki.
Kamtæ da ong u wa ki Khasi-Jaintia wa ki Garo da em ki da i yong ki hi i ktien wa ka dustur riti wa hap ki wow pynneh wei u dawa ki da ka jar jiar ka jylla.
“Ym ye i wow yoh ya ini pyn kattæ tangwa ha kawi ka sngi daw yoh neibhah ini toh iwa emkaam bha katni,” da ong u Pangniang.
