Ka sorkar jylla ynne ka sngi da pynbna ko wa da chim ya ka rai wa khaddooh wow kyrriah ya ki 342 tylli ki manyung na Them Metor cha ki Quarter ka Shillong Municipal Board wa em ha Bishop Cotton Road, Shillong.
Hawa pynbna yeini, neiliang u Symbood Montri Rangbah ka jylla, u Prestone Tynsong da ong u wa ki yung Quarter wa da em katni toh kiwa ym da biang de wei daw hap wow chna thymme 12 tylli ki yung (Block Building) kiwa daw ye u sah 13 hadooh 14 tylli ki manyung ha kawi ka Block.
Yow leh yeini da em kamwa 2.4 Acre i thaw wei daw pynkhreh da ka chnat Urban Affairs ya ka Detailed Project Report (DPR) yow tip hadooh katwon u lut yow leh yeini.
Da pyntip u leh wa ya ini i rai ka sorkar daw lai pyntip cha ka Harijan Panchayat Committee (HPC) wei ini u man du ya kini ki 342 tylli ki manyung iwa ka High Court leh da mynjur ko.
