U Montri wa pait ya ki kaam uiñke suwari ha ka jylla, u Paul Lyngdoh da ong uwa kiwa chongdai madan ha ka luti na Khyndailad cha Umsohsun daw kyrriah noh ya ki cha ki thaw wa da tipmit da jied da ka sorkar, wei ya kani ka luti da rai wow pynkylla bait noh kam ka luti lai kjat wa kynthup leh ya ka luti wa lai cha Jail Road.
U Montri da khana u wa kani ka rai da chim ynne ka sngi ha ka yalang wa emlang wa ki chnat waphær waphær nadooh ka chant pulit, ka Municipal wa MUDA.
Da ong u wa kiwa chongdai madan kiwa em ha tymbud luti daw kyrriah cha ki yaaw wa ka sorkar da pynkhreh ko ha MUDA Complex, ha ka yaaw kawa em ha Polo wa ha ka thaw pynyieñ kari kawa em ha Motphran. Da ong u wa ka chnat ka da e kti ko ya ini i kaam cha ki bor pynlai District wow pynbait katkam i emkaam kiwa chongdai madan kiwa da pyntipmit ya idæ (Registered).
U Paul da ong chooh chooh u wa ya katai ka sarok hadien wa da pynkyllooid, daw pynkylla kam ka thaw wow em kiwa tem wa put put wei daw em leh kiwa tem wa rwai ya ki sur tynre wa ki pynwyrngia ya kiwa wan uiñke suwari chapoh ka jylla wa cha ka sor Shillong.
Da ong u wa ini i booh ya kiwa tem wa put wa kiwa rwai daw man ko leh kawa pynyahaap yei naam yong ka sor Shillong kawa da jooh tip kam ka nongbah yong ka put ka tem ka rwai ka siaw.
U Montri da ong chooh chooh u wa ya ki bru kiwa lai chongke ha katai ka thaaiñ daw booh dei por wow psiah u mih ki katwa waroh chisngi u e laad bait du ya ki bru kiwa lai kjat.
