U Chairman ka High-Level Committee (HLC) kawa da seiñ hajrong i kaam wa yatoh waka Them Metor uwa man leh u Symbood Montri Rangbah ka jylla, u Prestone Tynsong da ong u wa ha ki kajiak sngi, ka sorkar daw chikmti noh ko yei thaw wa heh 2.5 Acre ha Them Iewmawlong, wei da pyntip u wa ya ka soskular namo ka Agreement wa da soi hapyrdi ka Hima Mylliem waka Shillong Municipal Board ha u snem 1954 da pynkylla noh hei thaw yong ka da ka Tripartite Agreement wa da soi hapyrdi ka Hima Mylliem ka SMB wa ka chnat Urban Affairs.
Da ong u wa ka chnat pynroi sor næ ka Urban Affairs daw chna pynmiat ko ya katai ka thaw hadien wa ka sorkar da chimkti ko wei da pynrap wa ka chnat Urban Affairs waka Municipal Board daw chikmti noh ya i thaw na u Syiem ka Hima Mylliem katkam ka soskular wa da soi pynthymme.
Hawa kylli, u Prestone da ong u wa i kyrriah ya ki bru kiwa sah ha katai ka thaw daw lai bait katkam ka aiñ, wei ka sorkar da paan yumut ko leh na ki bru stat aiñ hajrong katai ka kaam.
Hawa kylli hajrong i pynbaad wa ka HLC ym em yaklam chwa wa ka Harijan Panchayat Committee (HPC) hachwa wow ekti ya ka bui (Report), u Prestone da ong u wa ka sorkar da pynman ko yei lum yukheiñ ya ki bru kiwa sah ha katai ka thaw, tangwa ym em yoh yei ya krehlang neibhah wym em wa wan chakhmat.
Hawa yatoh wa i wan tuklar yong kiwi won ki kynhun wa na baar ya i rai wa i thmu yong ka sorkar wow pyrchah ya ka sorkar, u Symbood Montri Rangbah da ong u wa ki kynhun wa na baar jylla, lada toh da ki seiñ saiñpyrthai næ kiwi won ki kynhun, ymtoh u khuslai ki, tangwa toh u chaniah ha ka sorkar jylla neibhah wa iyi wow leh ko u man i katkam ka riti synchaar paidbah yong ka ri India.
