Shillong: Ka yalang wa jhan yong ka COMSO ynne ka sngi da rai ko wow pyrchah bait ya ka Citizenship Amendment Bill 2019 wei wow dawa pynkrehkaam noh ya ka ILP ha ka jylla.
Ka CoMSO da ong ko wa dap ko dei mynsien sñiawsih wa ka sorkar India da leh beinah ko deiwa pynkrehkaam ya ka ILP du ha Manipur tangwa ya ka Meghalaya kawa da dawa slem bha ym pynkrehkaam ya ka wei ini pynyoo i yei yoobeiñ ya ka jylla Meghalaya hi waroh kawi.
Da beiñ joor ko leh ya u lat ka jylla u wym pdiang ya ka MRSSA Amendment Ordinance 2019 wei da dawa ya oo wow soi noh ya kani ka Ordinance.
Kam ka dak wow pyrchah ya ka CAB wow krehkaam ko ha Meghalaya wei wow dawa pynkrehkaam noh ya ka ILP ha jylla, ka CoMSO daw lai paidbah ko cha ka thaw sah u lat ha Shillong (Raj Bhawan ) ha ka 13 tarik uni u bnai heipor 2:00 waje i sngi wei chwa itæ daw em ka yalang paaid chwa ha Motphran.
Neiliang ka CoMSO da kyntu ko ya waroh wow yawan ha kani ka sngi deiwa kyntu leh ya ki Dorbar Chnong wow chimkhia u phah ya ki paaid ka chnong wow wan wei wow e wyrta ha ka chnong hajrong ini.
Da kyntu ko leh ya waroh ki seiñbhalang, ki seiñ manbei, ki seiñ khynroo chnong, ki Association kam kiwa chong yaw, kiwa kamai kari, kiwa sika, wa kiwi kiwi wow wan cha kani ka sngi khnang wow pynyoo yei pyrchah ya ka CAB wei wow dawa ya ka ILP.
Da kyntu kyrpang leh ya ki MP, ki MLA, ki MDC wa kiwa yahkhmat seiñ saiñ pyrthai wow wan cha kani ka sngi.
Discussion about this post