Ka Bharatiya Janata Party (BJP) kawa em 2 ngut ki MDC ha Garo Hills Autonomous District Council (GHADC) da pynbaad ko wa ka NPP da yah bakla ko ya u Lat ka jylla, wei daw lai pynsñiaw leh ya ini i pyrchah hakhmat u Lat, u Satya Pal Malik ha ka sngi nyngkong 19 tarik hajrong i lai kam ka NPP wow chna ya ka Executive Committee wa thymme ha GHADC da ki 15 ngut ki MDC.
U Bernard Marak uwa man u MDC na Tura da ong u wa wa 15 ngut ki MDC ym toh i boon paaid neibhah wa katkam ka hukum wa da pynmih da ka Kachari ha u snem 2000 na ka mukotduma u Edmund Sangma wa u Vincent Sangma, da klam che wa neibynta wow chna ya ka EC, emkaam i kyrchaan ki MDC ym duna 17 ngut.
Hai jooh i por u Bernard uwa man leh u Vice President ka BJP, da ong u wa ka BJP ym pu em chim ko ya i rai wow kyrchaan ya ka NPP ha GHADC, tangwa yieñ bait ha ka yurim wow yakhun pyrchah ya i bam-tooh, deiwa klam che leh wa lada ka BJP u em ko ha ka EC toh u yoh ko wow yahkhmat yei pynlai ya ka Council.
