U montri i chait i khiah ka jylla u AL Hek uwa man leh u MLA ka BJP da pyntip u ynne ka sngi wa daw lai u cha Delhi mynstep ka sngi yow yachem wa u Home Minister u Amit Shah yow yaklam yasuk noh waka HNLC kawa da dep thoh cha u Hek da ka chithi wa kwah noh wow leh ya ini i kaam.
Daw lai yaklam u leh heiyatoh wa u Vice Chancellor ka NEHU kawa da wan ki seiñ yong kiwa sikai kamjooh kiwa lai puræ kiwa da wan yaklam ya oo heiyatoh wa kani ka kaam wei kam wow pynkynmoo wa da mih i pyrchah na kiwa boon yei pynyinsur yei por wa krehkaam u VC daka sorkar pyrdi.
Heiyatoh won wa ka khlam COVID-19 daw lai yaklam u yow yoh yarap poisa chooh chooh naka sorkar pyrdi heiwa da dep yoh du T. 16.79 klur wei daw yachem u wa u Minister of Health & Family Welfare yow e poisa chooh chooh yaka jylla Meghalaya. Deiwa ong leh wa duna bha i ye ka sorkar wow pynmih poisa nadooh wa da sangeh u mooyong wa kiwi.
Daw pyrchang u leh wow yachem wa u montri rangbahdooh ka ri yow yaklam chaphang ki dorbar chnong kiwa da kreh chitom neibynta ka khlam kamjooh ki Asha wa kiwi kiwa em hakhmat dooh yow yoh u e yarap yaki.
