U Montri Rangbah ka jylla, u Conrad K Sangma hawa jubab yeiwa kylli kiwa thoh khubor heiyatoh wa i tih mooyong, da ong u wa ym em khang yei tih mooyong tangwa iwa eh toh ka rukom tih donhi.
Da ong u wa ka Supreme Court ha u snem 2019 da ong ko hoi hi wow tih mooyong tangwa emkaam wow bood katkam ki kyndon ka aiñ MMDR Act heiwa da hap wow tih mooyong deiwa leh da ka Open Cast Mining diewa emkaam leh u man chngaaiñ ya kiwa tih mooyong kamjooh wow yada ya ka rymaw.
Tangwa lada yaklam wow tih mooyong biang dei yongrim iwa tip kam i Rat-Hole Mining, ym ye de u leh neibhah deiwa tih da ini i rukom wa chah khang u tih mooyong heiwa ka NGT deilang ka Supreme Court da ong ki wa i chngaaiñ ya kiwa tih mooyong kamjooh i yada ya ka rymaw toh iwa emkaam dooh.
Da ong u wa neiliang ka sorkar jylla dadep ko wow yaklam wa ka sorkar pyrdi yow pynhiar ya ka kyndon wow chah u tih mooyong na ka 100 Hectare cha ka 10 hadooh ka 5 Hectare leh heiwa dadep wow yachem wa u Montri wa pait ya u mooyong wa i tih mooyong uwa da thung da ka Committee kawa dadep yachem ar le sien wei daw wan ko leh cha Meghalaya yow yachem wa kiwa chah ktah.
U Conrad da ong u wa i rukom tih mooyong daw hap ko wow bood deiwa man Scientific wei neiliang ka sorkar dadep ko wow tyrwa da kiwa man Scientific iwa yahaap katkam i rukom man ki paar mooyong wa em cha i yow e laad ya kiwa khian bor leh yow tih mooyong ki.
Heijooh i por da ong u wa kani ka stat Technology wow pynemkaam toh u ye ko leh u yada ya ka rymaw kamjooh ya kiwa tih ya u mooyong.
Da ong u leh wa ka sorkar pyrdi da ong ko wym man de u tih mooyong dei yongrim wei iwon iwon i tih mooyong toh u man ko deiwa man Scientific lada heh la khian leh wei ka sorkar lai ko wow thooh ka luti kammon wow ye u leh yeini deiwa pyrkhat ya waroh.
Discussion about this post