U Montri Rangbah ka jylla Meghalaya, u Conrad Sangma da kyntu u ya kiwa chong chnong ka jylla Manipur wow wanrah yei suk i saaiñ yow lait i long i man wa katni u sih chooh chooh wei wow yait leh wow wanrah yei sñiaw yaphær niam kamjooh wow yait na ki kaam pynmynsoo.
Da pyntip u leh wa neiliang ki heh ka sorkar Meghalaya da yachem lang ki ynne yow pyrkhat ya kiwa boon kiwa na Meghalaya kiwa lai puræ ha Manipur khamtam ha Imphal kiwa da em kamwa 200 ngut.
Da kahan u leh wa ka sorkar da yaklam ko wa ki khynnah ka jylla kiwa em ha ki thaw puræ waphær waphær ka Manipur wei u yaleh u li thooh noh ki kini kiwa lai puræ deiwa pynbiang ya ka lieñsuiñ khlem pynslem wei da pynkhreh leh wow booh ya u Helpline Number uwa krehkaam waroh 24 kynta chi sngi yow ye ki bei ki pa ki khynnah wow yaklam wa ki khon ki wei lada emkaam ki iyi iyi.
Da kyntu u leh ya manbei manpa kamjooh ki khynnah wym toh u hær rngu ki neibhah ka sorkar Meghalaya da klam ko wa ka sorkar Manipur yow pynpoi yung smat ya ki khynnah ka jylla.
I kynaad ha Manipur da sdang i hadien wa mih i dawa na ki jaitbru Meitei kiwa sah ha Imphal Valley wow tipmit noh ki kam ki Schedule Tribe heiwa yow pyrchah yeini, ka All Tribal Student Union Manipur (ATSUM) da pynman ki ya ka lai paidbah wa da chimbynta da ki hajar ngut wei ynnin ka sngi da em ki yung wa chah thang wei da phah ka sorkar da ki Indian Army wa ki Assam Rifles wow pynlait im ya 4000 ngut ki bru.
Kam wow pynkynmoo wa chwa ini da em leh wa thang ya ka thaw wa da mut u Montri Rangbah ka Manipur wow pynman yalang paidbah heiwa ka sorkar da khang ko leh ya ka Internet ha waroh kawi ka jylla 5 sngi wei da pynkrehkaam ya ka Section 144.
