Shillong: U President ka Congress u Rahul Gandhi ynne da pynsñiaw u yei mynsien wa skem wa ka Congress daw poi biang ko ha ka synchaar hadien wa pyndep ya ka Election hapoh ka jylla.
“Ym kwah O wow ong hadooh katwon tylli ki chuki u jop i tangwa da em ka la-ær ha kylleiñ ka ri wa ka BJP ym em bien ko u ap ya ki paidbah wei ki kaam wa chim rai ko wow leh, da pyrchah ki paidbah ka ri waroh kawi,” da ong u heipor wa yaklam wa kiwa pathai khubor.
U Rahul da yachem u leh wa kiwa heh ki niam waphær waphær Christan, Hindu, Muslim, ki Niamtre Niam Khasi heiwa da pynsñiaw ha ki yei sñiaw tieñ yeiwa pyrchang ka BJP wow wanrah kawa man kawi donhi ka ri khlem em thaw de ya kiwi kiwa phær.
“Ini toh i thombor ya ka dustur riti ka jylla Meghalaya wa kiwi ki jylla hapoh ka thaiñ Mihsngi iwa wanrah ka BJP waka RSS wow wanrah du iwi donhi i sñiaw hapoh ka ri,” da ong u Rahul.
U Rahul da yaroh u leh ya u Montri Rangbah ka jylla u Dr. Mukul Sangma uwa da ye u wanrah ya ka synchaar khadar wa khooid hapoh ka jylla.
“U Montri Rangbah da leh bha u nadooh ki sarok heiwa u Modi da wan wai u ya ki sarok wa chna da ka Congress,” da ong u Rahul.
Hei yatoh won wa i krehlang wa kiwi ki Party u Rahul da ong u bien hi wow yakrehlang wa kiwi ki Party kiwa em ka jooh ka thong wei ym em kwah won u krehlang wa kiwi kiw party tang wow pyndepkaam.
Ye wow pynkynmoo heini wa ha ka thaiñ Northeast ka BJP da dep chna ko ya ka North East Democratic Alliance (NEDA) kawa man ka yatohlok waroh ki seiñ hima sima kiwa na ri-loom kawa yahkhmat da ka BJP.
Napoh ka Meghalaya da em ka United Democratic Party (UDP) waka National People’s Party (NPP) tangwa ka BJP, NPP waka UDP da yaleh Election ki jar jiar.
Ka UDP da krehlang ko waka HSPDP ha ri-loom Khasi wa Jaiñtia katwa ha ri-loom Garo won da krehlang ko waka Garo National Council (GNC) neibynta kani ka Election.
Discussion about this post