U Mukul daw psiah BJP noh u iwa man i daw wym krehlang ka Congress wa TMC ha Meghalaya: Vincent Pala

U President ka Meghalaya Pradesh Congress Committee, u Vincent H Pala da ong u wa da em i yaklam wa uwa yahkhmat ka Trinamool Congress (TMC), u Dr. Mukul Sangma wow uiñ biang u chapoh ka Congress, tangwa neiliang u Mukul da pynsñiaw u wa kwah u wow psiah noh cha ka Bharatiya Janata Party (BJP) hadien ka Election Lok Sabha.

Hawa phla hajrong ini i yaklam, u Vincent Pala da ong u wa u Dr. Mukul em u i kwah wow psiah cha ka BJP ryngkat wa kiwi wei da pynbaad u leh wa da pyrchang ki wow khut ya boon kiwa kreh yong ka Congress.

Da ong u wa na ini i daw wa ka Congress kyntait ko wow ya krehlang waka TMC ha Meghalaya.

U Vincent da ong u leh wa i yaphær ymtoh hapyrdi yong oo wa u Mukul Sangma næ wa kiwi ki kiwa yahkhmat neibhah da pynsñiaw u ha ka Party wa smat u wow ieh noh yei kaam President yong ka Party wei wow ha kiwa mon u Dr. Mukul wow yahkhmat yaka Party, tangwa i sñiaw yaphær toh wa kiwa yahkhmat ka Congress ha Meghalaya neibhah da tip che ki wa u Dr. Mukul wa ki bru u daw lai psiah noh ki cha ka BJP.