U Montri Rangbah ka jylla, u Conrad Kongal Sangma da ong u wa uwa yahkhmat ka Liang Pyrchah uwa man u MLA ka Trinamool Congress, u Dr. Mukul Sangma, da pynbaad u pyn ya idæ hi heiyatoh wa i kaam pynbait pood neibhah oo uwa pynbiang ya ki kot ki sla wa ka Map ha u snem 2011.
U Conrad da ong u yeini hawa jubab yeiwa pynbaad u Dr. Mukul heiyatoh wa ka soskular (MoU) pynbait pood wa da dep soi da ki ar ngut ki Montri Rangbah, ka Meghalaya wa Assam. Heiwa u Dr. Mukul da ong u wa lada ka AITC chah jied ko wow poi hei bor daw pyndam noh ko ya ka MoU, neidaw i wym hun ki paidbah.
Hawa yaklam wa kiwa pathai khubor, u Conrad da ong u wa man iwa sñiawsih wa ka Liang Pyrchah pynmih ko ya kam kini ki kyntien wow pyndam noh ya ka MoU, deiw pynrap wa toh ki kiwa da synchaar 8 snem khlem leh iwon iwon, tangwa katni hawa yoo ki wa ye wow leh iwon iwon, da kwah pathan ki wow pyndam.
Heiyatoh wa i klam u Mukul wa hap wow pait janai ya ki thaw wa ya ki Map, u Conrad da ong u wa ki Map wa ki bui næ ki kot ki sla toh kiwa da chna hi da ki ha kitu ki por wei lada ong wa hap bichaar bniah næ pait bha ya kitæ ki map, toh u leh ki nadooh u snem 2011.
Da ong u wa hadien wa dadep ki wow e ya ki Map ki kot ki sla wa ki bui yong ki cha Assam ha u snem 2011 wow pynyoo wa kitæ ki thaw wa yakajia, katni won ki jooh ki bru wa ong wa toh u kyruiñ biang cha ki Map, deiwa pynrap wa ka man iwa phylla, wa uwa yahkhmat ka Liang Pyrchah lada pynbaad u tæ pynbaad u pynya oo hi.
Da ong u wa ini i klam hajrong kani ka phang boi wa da jan ka Election neibhah da ki snem ym yoh phang ki wow klam Election, wei neiliang u Conrad da ong u wa ki ymtoh u chim ki kam kini ki phang wa ktah wa kyllaiñ, tangwa toh wow klam leh ya i roi i paar wa kiwi ki mat wa sñiawkhia ki paidbah.
Hawa kylli hajrong i pynbait pood ha ka bynta kawa ar wa kynthup ya ki 6 tylli kiwi won ki thaw khappood, u Montri Rangbah ka Meghalaya da ong u wa ya ini daw yaklam biang hadien wa da pyndooh yei eh i khor wa mih nei chlai um, neibhah kamwa man ki bynta ha Assam chem chitom ki nei chlai um.
