Ka National People’s Party (NPP) Meghalaya lyngba uwa e ktien yong ka u Nickey Nongkhlaw ha ka kyrwoh wa da phah da ong ki wa da yoo kyndeh wow pait kammon wa u Mukul Sangma da pynemkaam u ya u diah yong oo u Zenith Sangma wow dawa u pynhiar chuki ya u montri rangbah ka jylla u Conrad Sangma. Ka NPP da ong ko wa hapyrdi i yoo kulmar i long i man ka Congress katni, u Mukul Sangma da muja u ya ini yow pynneh kamni yow myntoi ya oo samen.
Ka NPP da ong ko wa u Mukul uwa kwah bait wow mih khubor, da pynemkaam u ya u diah yong oo yow kynmoo ki bru oo ha ki kaam saiñhima. Wei chwa u wow kdaw kti u ya kiwi toh u pait chwa u yei long i man ka Congress ha Meghalaya katni.
Ka NPP da kam ko leh em boon ki MLA kiwa katni kiwa da pynkhreh wow yieñ pyrchah ya u Mukul nei rukom synchaar u dei bor wei uwa leh katwa ye u yow ksoh yei bor. Kamtæ ym toh iwa phylla yow yoo wa boon kiwa yahkhmat ka Congress da yut ki hapoh ka jylla wa ha Delhi, wei daw em chooh boon kiwa daw yut na kani ka lieñ kawa da ngam.
Ka NPP da ong ko wa katni u Mukul wa u Zenith iwa ka-it dooh ki wow klam toh chaphang ka MeECL. Kini ki chi payu da sñiawthooh ki katwon ka poisa wa da lute ki na ka MeECL ha ki 8 snem wa nachwa, wei da eh ya kiwon kiwon wow yoh biang ya kani ka poisa hei por wa tbian. Na ini i daw da dooh noh ki yei bor, kamtæ da man ko iwa suk dooh wow dat du hajrong kani bait ka jooh ka phang.
Da ong leh wa ha u 2017, heipor wa ka Congress em ko hei bor, u Mukul Sangma da jan poi u cha u pood wow e ya ka MeECL cha ki bru samen deiwa soi soskular wa ka Renew Joule Private Limited yow chim yei hok ka chnat bordiñ wow chna ya ki Power Plant. Da mang u ya ka Ri-Bhoi District, Mendipathar wa Ampati neibynta wow ekti cha ki bru samen (Privatisation Deal). Ha u jooh u snem da soi soskular u wa ka ETA Star Infrastructure Ltd, Brijraj Power Metallics Ltd waka MSGC Power Ltd yow ekti ya ki Thermal Power Project wa khian yong ka MeECL cha ki Company ki bru samen. U Mukul da e u leh chiboon ka poisa ka MeECL cha kini ki Company, iwa da pyntkoh ya ka chnat deiwa hap u kit ram. Wei du hadien wa pyrchah ki bru te pyndam u Mukul ya kiwa da mynjur u hadien wa da dep ktah joor ko ya ka chnat. Tangwa hadien wa pyndam u ya kini, da ekti won u ya kini ki kreh cha ka NEEPCO. Ini da ktah chooh chooh ko ya ka MeECL kawa da hap won wow su cha ka NEEPCO won.
Kamtæ ka NPP da ong ko wa ym toh iwa phylla wa heipor u Mukul wa joor du i dooh bordiñ donhi iwa pteiñ hadooh 4 bnai ha ka chi snem, neidaw wa da booh u heiwa eh ya ka MeECL hadooh wym em poisa de ko wow leh yei kaam yong ka neidaw ki soskular wa da soi da ka Congress ha u 2007.
Da pynkut deiwa ong wa i batai u Mukul wa u diah u hajrong ka chnat Bordiñ toh iwa ym yahap de. Wei lada em ki iyi iyi i sñiaw ya kipaidbah, ym toh de wow yieñ yaleh Election ki wei u Mukul pathan wa toh u hiar chuki noh u kam uwa yahkhmat ka liang pyrchah hajrong ki kaam wa da leh u heipor wa em u hei bor.
