Ynne ka sngi ha ka yalang paidbah ki 13 chnong yong u Nehemayah Tyngkan u kyrtong ka Congress na Mowkaiaw Constituency ha Madan Phutbol Mooblang, Iooksi neiliang u Rikut Parien uwa man u President ka Congress na ka Constituency da ong u wa kani ka yalang toh kawa kyrpang neibynta ki 13 chnong wa ka Constituency hi leh waroh kawi.
Da ong u wa kani toh ka por u dooh thiah dooh dem i khnang wow pyrkhat wow jied ya uwa mihkhmat neibhah ka jaitbru em ko ha kyndian synrang.
Chooh chooh da ong u wa lada bakla i ym myntoi u sah ha ki yung wa heh tangwa manda mih cha lait daw hap yah wa kiwa sonteri yow e yada neidaw wa daw sahdien ware ka thaaiñ.
Da ong u wa boonsien kiwa mihkhmat yong ka Constituency chong kli-kti donhi ki ha Yung Dorbar Chna Aiñ ka jylla tangwa chem i wa u Nehemayah man u u bru uwa dap chynrang wa nood u klam wow yasaaid neibynta ka jaitbru.
Heijooh i por da ong u wa ymtoh u chaniah ya kani ka sorkar NPP neibhah heipor wa wanrah ka sorkar pyrdi ya ka CAA waroh ha ka jylla pyrchah ki ya ka tangwa neiliang ka MP ka NPP, ka Agatha Sangma ha Parliament da kyrchaan ko ya kani ka aiñ.
Heiyatoh wa i pynbait pood da ong wa ye ka sorkar deiwa pynbiej ko ya ki paidbah neibhah smat ko wow pynbait pood deiwa boon ki thaw ka Meghalaya da e ko cha ka Assam chiboon tylli.
Da khana u leh ya ki kaam baam-tooh kani ka sorkar wa katni nadooh ka thaw pynyieñ Bus thymme ha Shillong namo ka ISBT kawa mar wai pai um wot ko, ka tnoom kyllung ka Yung Dorbar Chna Aiñ ka jylla kawa da haap deiwa kyntu danda leh ya u Nehemayah wow man u uwa syndong, da klam u leh yei wanrah ya ka aiñ yakhle namo ki Casino wa kiwi kiwi de.
