U Working President ka Meghalaya Pradesh Congress Committee (MPCC), u Pynshngain N Syiem da ong u wa ka Congress smat ko wow pdiang ya ki 5 MLA wa da chah beh dkhot, lada dam noh ki u kyrchaan ya ka sorkar Meghalaya Democratic Alliance (MDA) wa yahkhmat da ka NPP hapoh ka jylla.
Da ong u wa chong won i ha ki 5 ngut ki MLA, neibhah lada dam ki wow kyrchaan ya ka sorkar, ka Congress leh smat ko wow pyndam yei beh seiñ wei ye ki leh wow yoh ya ka Ticket neibynta ka Election 2023.
Hawa kylli, u heh ka Congress da ong u wa napyrdi ki MLA yong ka Party kiwa yut noh kiwa 12 ngut kiwa da psiah cha ka AITC da silet ki, wei da pyrchang ki wow yoh Ticket noh na kiwi ki Party. Da ong u leh wow pynkhlan næ psiah cha kiwi ki Party kam ka Aam Admi Party (AAP) ymtoh iwa suk ha kani ka jylla.
Hawa kylli chooh chooh, u Pynshngain da pyntip u wa hadooh katni ka MPCC ympu yoh yutip ko wow em ki MLA wa da yut wow uiñ biang, tangwa da ong u wa boi ye wow yaklam bait waka AICC. U Pynshngain da ong u leh wa hadien i long i man ha ka sorkar synrop MDA, em ki MLA kiwa da yaklam waka Party wow yakhun noh yaka Election 2023 naka Congress.
