Hadien i jia tyrrah kari ini wa dep ha ka 21 tarik ha Thadlaskeiñ iwa da wanrah yei khlaad ki ar ngut hadien wa tyrrah ka Truck ya ki chi bei chi khon kiwa dang lai luti, heiwa u khon wa ar snem da khlaad u katwa ka bei dang em ko hapyrdi i chah sumaar, wei kawi won ka kari Eeco wa chah ban da khladd noh uwa yah ka, kamtæ ynne ka sngi neiliang u MLA ka Jowai, u Wailadmiki Shylla da khut yalang u ya ka District Road Safety Committee neibynta u ya pyrkhat yaphyllu yumut yow leh iyi ræ iyi ya ki thaw wa booh hei maa ya ki kari wa lai ha sarok kamjooh leh ya ki paidbah wa lai luti.
Ha ka yalang wa da pynman ha Hall ka Highwinds hajan ka nan Thadlaskeiñ da emlang nadooh ki bor District, u DTO ka West Jaiñtia Hills, ka chnat pulit, ka chnat PWD, ka chnat i chait i khiah, kiwa yahkhmat chnong ka Mukhla pyllun wa kiwi.
Hadien ka yalang da lai li pait li sylli ki ya ki thaw wa yoo emkaam wow leh iyi ræ iyi khnang yow lait nei jia wa sñiawsih ya ki kari kamjooh ki bru. Itæ toh hei bynta u sarok wa jia i ya tyrrah kari ini wa dep ha Thadlaskeiñ wei neini won da lai ki cha chnong Mookyndur hei bynta u sarok wa dong bha iwa jia i kylla i tyrrah kari neipor cheipor.
Ha kani ka sngi wa lai li pait ha Mookyndur da em leh kawi ka Truck kawa da noh charood u sarok yoosar neidaw wym ye de uwa yah wow yakhun pynjem ya ka kari tæ dong u charood.
U Wailadmiki hawa klam wa kiwa thoh khubor ong u ha i bynta u sarok ha Thadlaskeiñ da phah u wow chimkhia chna ki luti lai kjat neibhah toh ka thaw wa boon ki paidbah wa lai luti wa kynthup nadooh ki khynnah skur, najrong wow booh leh ki Speed Breaker khnang yow chngaaiñ ki paidbah khlem da ktah won yei sahkut kari.
Neitæ ha Mookyndur won kawa man ka thaw wa dong bha wei kawa wanrah i jia sñiawsih neiwa jia wa boon jait, ong u wa emkaam wow booh ki dak ki chin wa che kamjooh ki Speed Breaker dang najngai khnang wa ki kari leh u pynjem ki chwa wow poi hei thaw wa dong.
Discussion about this post