Shillong: U Montri Rangbah ka Meghalaya, u Conrad K Sangma da klam che u wa ka sorkar jylla hapoh i yahkhmat ka NPP u pteiñ i pyrchah ya ka Citizenship Amendment Bill (CAB) lada kani ka aiñ man ko pyrchah ya ki paidbah ka jylla.
Da ong u leh wa yieñ ki ha ka jooh ka yurim nadooh nyngkong ka sngi wa thmu wow wanrah ya ka CAB wei i bha i miat ka jylla wa ki paidbah man i iwa haphrang dooh ya ka sorkar jylla wa katni.
Hajrong i pynbaad wa da rap pynjem ka sorkar jylla yei pyrchah ya ka CAB, u Conrad da ong u wa ym man i iwa bha wow bichaar lada pynjem namo pynkhor u hajrong kani ka bynta.
“Nachwa ym tip i yi wa em hapoh kani ka aiñ wei sah i hei doom i langoh wei ymtip lada man ko ka wow pyrchah ya i (paidbah) wei em leh kiwi ki kyndon neibynta wow yada ya i hok yong I,” deiwa pynrap leh wa em boon ki yaklam wa ka sorkar pyrdi hajrong ki kyndon ka CAB.
U Conrad da ong u leh wa ki seiñ waphær waphær daw yoh ki wow yachem wa u montri ki kaam pohyung ka sorkar India, u Amit Shah wa ki sahep kani ka chnat wei ka sorkar jylla daw chim ko ya ka rai kammon wow lai chaphrang.
Chooh chooh da ong u wa i pyrchah ymtoh ya i kyntien CAB neibhah ini i kyntien da em i nadooh ki por wa dadep, tangwa hapoh kini ki kyntien em ki bynta wow pyrkhat chiboon.
U Conrad da ong u leh wa kwah ki wow tip lada rah namo ympu em ya i sñiaw ki paidbah ka jylla ha kani ka kynti.
Hajrong ka rai wa mih na ka yalang wa u montri ka kaam pohyung ka sorkar pyrdi ha ka tayaw wa dadep ha Delhi, u Conrad da ong u wa da khut u ya u Amit Shah wow wan cha Shillong wa cha kiwi ki jylla ka thaaiñ mihsngi.
“Da pynsñiaw O wa man i iwa emkaam wow phyllu yumut hajrong ka CAB wei neiliang u Amit Shah da pynsñiaw u yei mynjur hajrong ini”, da ong u Conrad.
da pyntip u leh wa u Amit Shah ye u wow wan cha Shillong wow wai ya ka Police Academy heiwa daw ye u phyllu yumut bha wa ki boon tylli ki dhab nadooh ki seiñ saiñ pyrthai, ki heh ki chnong wa kiwi kiwi hajrong ka CAB.
Discussion about this post