Ka Executive Committee yong ka Khasi Hills Autonomous District Council (KHADC) ha ka 11 tarik uni u bnai da rai ko wow wanrah noh ya ki kyndon yong ka Market Act, yow khang pyrchah yei ah kilo ya ki mar rep wa wan dai da ki warep cha ki yaaw ki haat ha Ri-loom Khasi.
U Chief Executive Member ka KHADC, u Pynïaid Sing Syiem da ong u wa kawi na kini ki kyndon toh ka Khasi Hills District Establishment, Management and Control of Market Rules 2024 kawa pynchong yurim na ka Khasi Hills District Establishment, Management and Control of Market Amendment Act 2023.
“I myntoi lyngba kani ka Rules toh wa ki warep ha kylleiñ ka Ri-loom Khasi kiwa haap hapoh u pood u ang yong ka KHADC ymtoh de wow chah u ah kilo ki mar rep hawa lai dai cha ki yaaw ki haat,” da ong u.
Da ong u leh wa ka Council da yoh ko yei bor lyngba ka aiñ wow chna ya ka Sub Committee wei ha kani ki kyndon daw pynche chooh chooh wym em katæ ka ah kilo ha ki yaaw yong ka District Council, ki Hima, ki chnong næ ki yong ki bru samen.
U CEM da ong u leh wa kani ka Committee daw chim ko yei rai wow pynchitom ya kiwon kiwon kiwa lai pyrchah ya kini ki kyndon, khamtam hawa yatoh wa i ah kilo ya ki mar rep yong ki warep katkam wa da phah ha ki kyndon.
Discussion about this post