U Montri ka chnat Social Welfare, u Paul Lyngdoh da pyntip u wa ha u snem 2020, ka chnat da pynmih ko yaka hukum neibynta ki DC ka East Khasi wa West Khasi Hills District deiwa ong wa katkam ka aiñ Lineage Act 1997 ka KHADC, ym em khang ko yei e ST Certificate cha kitu kiwa chim dei kur u pa næ ka bei wei chah hi leh wow chim dei kur u kurim da ki kynthai wym toh ki Khasi.
Hajrong ini, u Paul da pyntip u wa ha u bnai wa ar uni u snem, ki dkhot ka HYC da yachem ki wa oo yow pynsñiaw yei pyrchah ya kani ka hukum wa da pynmih haka 21-07-20, wei deiwa pykhat ya ki yurim wa da pyrchah yeini, da khut u yaka yalang haka 28-02-24 heiwa da emlang ki bru wa mihkhmat yaka KHADC deilang wa ki dkhot ka HYC.
Ha ini i yaklam da chem wa kani ka hukum wa da pynmih da ka chnat Social Welfare man ko pyrchah yaka aiñ ka KHADC kawa da dep klam che chaphang i rukom chim kur kawa da yoh leh yei mynjur na ka sorkar jylla kamjooh leh na u Lat ka jylla wei da man ko kawa da embor pura kam ka aiñ.
Kamtæ da ong u wa ym em uwon uwon u sahep sorkar wa ye u pynmih hukum kawa man pyrchah yaka aiñ wei ha kani ka yalang da rai wow phah pyndam noh ya kani ka hukum wa da pynmih kawa chah u e ST Certificate cha kiwa chim kur na u pa kamjooh ki kynthai kiwa na kiwi ki jaitbru wa chim dei kur u kurim.
Da pynche u leh wa da em chwa ki kyndon wa da booh kammon wow e SC/ST Certificate kawa da pynmih lyngba ka Office Memorandum (OM) haka 19-03-14 kawa da phah cha waroh ki DC ki District wa em hapoh ka jylla tangwa ha kani ka hukum won ym em kdaw ko wa em ka Tribe Certificate wa da pynmih da ka KHADC kawa tip kam ka Khasi Tribe Certificate kawa emkaam u yoh chwa wow yaleh yaka ST Certificate hapoh ki thaw wa em hapoh ka KHADC.
Kamtæ da pynkylla noh ya kani ka OM deiwa booh lang ya ki kyntien wa emkaam u yoh yaka Tribe Certificate ha ki thaw wa em hapoh ka KHADC wow e da ka KHADC hi wei ini u man ko kam iwi na ki kyndon hawa yaleh ST Certificate.
Discussion about this post