Ka dhab ki Montri yong ka sorkar Meghalaya da rai ko wow pynduna noh yei lai baar ri ki sahep sorkar wei u chah noh du 2 sien chi snem itæ leh ryngkat ki yurim kiwa biang.
Hawa klam cha ki laad pathai khubor, u Montri uwa man leh kam uwa e ktien ka sorkar MDA-II, u Paul Lyngdoh da ong u wa ini i rai da chim deiwa booh hakhmat ya ka muna tangka ka jylla wei heijooh i por hajrong i emkaam wow pynchong yurim bha ya ini i rukom lai.
Da ong u wa lada u jooh u sahep sorkar hap u wow lai arsien, hap u wow e kti chwa ya ka bui (Report) yow pynhun yei daw wa da lai hachwa, wei deiwa ye u wow e ya ka Report kawa ye u pynhun wa kawa ye u pynyoo yow soh, daw ye wow e bor wow lai biang sa chisien, wei da pynrap chooh chooh wa ka sorkar daw pynbiang poisa ko du yei lai kawa da mynjur katwa ya kiwi won i lai daw hap wow kyrchaan poisa da ka sorkar India næ da kiwon kiwon ki Agency wa na baar ri.
Heijooh i por u Montri da pyntip u wa ini i rai yong ka sorkar ym krehkaam ko lada kini ki heh sorkar lai ki cha baar ri yow pdiang ya ki khusnaam neibynta yong ka sorkar Meghalaya.
Hawa kylli, u Paul da ong u wa da em i kyrpaad wa yei lai emkaam ki sahep sorkar cha baar ri wa emkaam wow yoh bor ki na u Montri Rangbah ka jylla.
Da ong u leh wa khnang wym em de i pynlut phut ya ka poisa paidbah, ka sorkar wa katni da rai ko wow pynchong yurim bha ya kam kini ki lai wei wow pynduna yei lai cha baar du ar sien chi snem deiwa pynbiang leh ya ka Report chwa u lai.
Heiyatoh won wa ki Montri sorkar, da ong u wa ini u chong leh hei e bor ka Ministry of External Affairs (MEA), wei dang ini wa dep ka MEA da wanrah ko yei kyndon wow pynrkhiñ bha wot wow e bor ya kam ini i tyrwa wow lai cha baar ri.
Discussion about this post