U Health Minister ka jylla, u Wailadmiki Shylla da ong u wa da pyndam ya ka Public-Private Partnership (PPP) yong ka Tura Medical College wei kattu ya kani ka College u pynlai noh da ka sorkar.
Heiyatoh wa ka PPP Model, u Wailadmiki da ong u wa da pyndam yeini khnang wow ye u pynlai ya ka deiwa pynmyntoi ya ki paidbah ka jylla.
Da ong u wa ka sorkar toh neibynta ki paidbah wei ym leh pyrchah yeiwa angnood ki, kamtæ da rai wa ya ka College daw pynlai noh pyn da ka sorkar hi.
Chooh chooh da pyntip u wa ym slem de ka sorkar daw sdang ko wow thung ya kiwa sikai ha kani ka Medical College, hanla em u moochynthut neibhah wa i kreh man iwa dajan dep wei sah sa du ka Hospital donhi.
Da pyntip u leh wa daw lai pait u ya ka Tura Medical College wei da angnood bha u wow lai cha Garo Hills.
Kam wow pynkynmoo wa da mih chiboon i pyrchah nei thmu ka sorkar wow leh da ka PPP heiwa ki paidbah da ong ki wa deiwa leh kamni daw duna leh ki MBBS Seat, daw syad leh ka bai puræ, daw dooh leh ka sorkar yei bor wow leh neibynta i miat i bha kiwa chong chnong neibhah manda chimkti da ki bru samen daw pyrkhat ki yei nong donhi.
Heiyatoh won wa i dawa sdang Medical College ha kiwi ki thaw kam ha Jowai da ong u wa ymtoh iwa suk wow pynhun pynbiang ya waroh ki kyndon yow booh Medical College wei ka sorkar daw hap ko wow pait yeiwa ye sakhiat u man.
Heiyatoh won wa ka Shillong Medical College, u Wailadmiki da ong u wa ki Class toh kiwa da sdang neibynta ka 1st Batch ka MBBS.
Discussion about this post