U Lamphang ka Yung Dorbar Chna Aiñ ka jylla, u Metbah Lyngdoh da khana u wa ka bui (Report) takit yong ka IIT-Guwahati da pynyoo ko wa i chna ya ka yung dorbar wa thymme ha Mawdiangdiang man ko kawa chngaaiñ wow pynemkaam.
Da khana u wa katkam ka Report ka yong ka IIT-Guwahati da kdaw che wa i oor i tnoom kyllung toh neidaw wym ya krehlang hapyrdi kitu kiwa pynkreh yei kaam wa kynthup ya kiwa pynwandur (Designer) wa u Contractor.
Da ong u wa neidaw ka bui da ong ko wa i chna man i iwa chngaaiñ, neiliang ka High Powered Committee (HPC) da kwah ko wow tip ileh wa oor ini i tnoom wei neiliang ki dkhot ka HPC da kyntu ki ya ka sorkar wow bichaar bniah ya ki daw wa da pynman yei tnoom wow haap i. Da khana u wa neiliang ka sorkar da paan pynche ko na kiwa pynwandur wa na u Contractor.
Da ong wa neiliang ka sorkar katkam ki kyndon wa da soi soskular, ka Company wa pynwandur daw hap ko wow su katkam ki kyndon daiñ kuna (Penalty), wei katkam wa pyntip da ka Company da mynjur wow leh yeini, wei heijooh i por u pyntikna wa ki bru kiwa tip yei kaam toh u em bait ki ha Shillong yow pait hadooh wa da pyndep yei kreh.
U Lamphang da pyntip u wa i tnoom kyllung wa thymme daw pynbiang hi da ki Company khlem da emkaam su de, wei ym emkaam su de lada mih biang ki kaam hawa yatoh wa kani ka tnoom.
Ya ka yung dorbar thymme yong ka jylla da chna da ka Rajkiya Nirman Nigam Ltd kawa na Uttar Pradesh ha i lut wa T. 127 klur. U Metbah da khana u wa neiliang u Contractor leh da pdiang ki yei duna wei ka Company da mynjur wow chna biang ya waroh iwa da haap da oor.
