Ka Meghalaya Football Association (MFA) da pyntip ko wa daw pynsangeh chwa ya ka Meghalaya State League 2024 kam chibynta wow e laad yow pynkhreh ya ka National Football Championship ka Santosh Trophy 2024-25.
Kani ka lympung toh kawa daw sdang ha uni u bnai, kamtæ ka MFA da kwah ko wow pynkhreh ya ka liang wow mihkhmat ya ka jylla wei ya ka Meghalaya da booh ya ka hapoh ka Group E deilang wa ka Arunachal Pradesh, Assam wa Nagaland. Heiwa du ka liang wa yoh nyngkong u yoh ki u lai chakhmat.
Kiwa yalehke ka Meghalaya toh kiwa daw jied da kiwa chibynta ha ka MSL wei da emkaam wow pynlait yei por ki wei kamjooh yow lait ki na iwon iwon i takha yow yoh ki u chimbynta ha ka Santosh Trophy.
Kamtæ ki yalehke wa khaddooh ka MSL 2024 u man ko ha ka 7 tarik uni u bnai.
Kam wow pynkynmoo wa ka Meghalaya da rem Final ko ha ka Santosh Trophy 2022-23, kamtæ ka MFA ha uni u snem da kwah ko wow jop syndon ya kani ka lympung yalehbol.
Ya ki tarik wa daw pynman biang ya ka MSL daw pynbna won ha kini ki sngi wow wan.
Discussion about this post