Ynne ka sngi u kyrtong MP ka UDP uwa da monlang ka HSPDP hapoh ka Regional Democratic Alliance (RDA), u Robertjune Kharjahrin da pynman u ya ka yalang paidbah ha Khliehriat West, East Jaiñtia Hills.
Hawa e i klam da e khublei u ya u Kyrmen Shylla heiwa kam u Montri sorkar da wanrah u yaka Drugs Policy wow yakhun pyrchah ya i kyrni pynemkaam drugs hapoh jylla wei da pyrchah u leh ya i thmu ka seiñ kiwa dai kiad wa kwah u wai dukan ha ka sngi Bibar.
U Robert da ong u wa da toh i por wow bujli noh ya u MP na ka Shillong Parliamentary Constituency neibhah ym jooh klam u ha Parliament wei i thrang i angnood ki paidbah man i iwa sepai waroh.
Da ong u leh wa u Vincent Pala ha u 2019, da ong u wa ym emkaam yaka ILP neibhah wa man ko kawa da rim wei ini da pyntakha bha ko ya kiwa boon.
Chooh chooh da ong u wa ka RDA yieñ ko haka yurim wow yada ya i dustur riti wa kyrpang ka jaitbru.
Da ong u wa i khang wow tih mar pohkhyndaw da ktah i ym du ya ki paidbah ka Jaiñtia Hills tangwa ka jylla hi waroh kawi wei da toh i por wow yaklam waka sorkar pyrdi heiyatoh wa ini.
Sñiawsih u leh wow yoo ya ki kot ki sla wa ong wa emkaam i thaw wa heh 100 Hectare wow tih mar pohkhyndaw tangwa kiwi ki aiñ ong ki leh wa emkaam du ya ki thaw wa khian kamwa 4 Hectare kamtæ emkaam u yaklam waka sorkar pyrdi wow pyndam noh ya ka MMDR Act na ka jylla.
Da ong u leh wa ka Ri-loom Jaiñtia em ko i laad wow ye u pynku ya i khayi waka ri Bangladesh kamtæ emkaam u chna ya ki thaw wow ye u khayi deiwa suk wa kani ka ri.
U Robertjune da e khublei u leh ya ki waheh wa sian wa da dawa wow yoh yaka Sixth Schedule hapoh ka jylla tangwa katni da em kiwa kwah u pyndooh noh ya ka deiwa e nongmuna wa ha kiwi ki thaw da sdang i yakhih wow dawa yaka Sixth Schedule kam ha Ladakh wow yada ki ya i khyndaw yong ki.
Heijooh i por da pyrchah u leh yaka Hindu Ideology, i khang wow baam doh masi, i phah klam ya i ktien Hindi, ka aiñ UCC wa kiwi kiwi kiwa ktah yaka jaitbru yong i.
Chooh chooh da ong u wa ka RDA da klam che ko wow burom ya waroh ki jait niam wei u klam u wow tipmit ya ka Niamtre, Niam Khasi kam ki Minority namo ki khian paaid hapoh ka ri India khnang wow yoh myntoi ki na ki Scheme ka sorkar pyrdi.
Da ong u leh wa waroh chi kattu da yoo wa chem chitom kiwa kreh ASHA, kiwa chet ja-sngi, kiwa kreh Aganwadi wa kiwi kiwi tangwa emkaam ya u bru wow klam neibynta i hok yong ki waka sorkar pyrdi.
Chooh chooh da ong u wa lada cha kiwi ki jylla yoh ki ya ka Direct Funding namo i yoh ya ka poisa na ka sorkar pyrdi ha ki chnong heini won hadooh katni ympu em wa yoh ya ka kamtæ wei u yaklam u wow pyntikna wow poi bait ka poisa ha ki chnong ki thaw khang wow ye u pynmiat wei u pynphooh ya ki.
Da ong u leh wa emkaam u pyrkhat bha chwa wow jied ya ki kyrtong ha ka 19 tarik wow man kam u MP wow mihkhmat u neibynta ka Ri-loom Khasi Jaiñtia wa kamjooh ya waroh ki jait niam napoh ka Shillong Parliamentary Constituency.
Discussion about this post