Uwa yahkhmat ka Congress Legislature Party (CLP), u Ronnie V Lyngdoh ynne da kynthah u ya u MLA ka BJP na South Shillong, u Sanbor Shullai yei wym em klam u hapoh ka yung dorbar wa dang dep pynman.
Yeini da ong u yow jubab yeiwa pynbaad u Sanbor wa u MP ka Congress, u Vincent H Pala wym em leh u iyi iyi neibynta ka Constituency wei da chong baam sa’ut hi-eh u hapoh ka Parliament la 5 snem.
U Ronnie da kylli u katwon sien wan u Sanbor Shullai chapoh ka yung dorbar wei la katwon sien da klam u.
U Ronnie da ong u leh wa u Vincent Pala kam u MP da leh u chiboon ki kaam wei kam u bru ym em man u uwa boon ktien wei ym em kwah u leh wow mih khubor kam kiwi. “Chiboon ki kaam wa da leh hapoh Meghalaya toh deiwa chimkhia u Vincent Pala,” da ong chooh chooh u.
Da ong u leh wa ini i pynbaad u Sanbor toh iwa thylli neibhah oo leh kam u MLA ym jooh klam ware u hapoh yung dorbar wei em ki por tang u lai leh ym em lai u.
U Ronnie da ong u leh wa lada wan donhi chapoh dorbar khlem klam dang bha u chong ha yung deiwa pynrap wa u Vincent Palat da klam u chaphang kiwa boon ki kaam wa ktah yaka jylla hapoh Parliament.
Heiyatoh won wa i pynbaad wa u Vincent Pala ym em lai embynta u ha ki yalang wa pynman da ka DISHA hapoh Constituency, u Ronnie da pynche u wa ymtoh u sñiawthooh bakla neibhah ha ki 2-3 snem neidaw wa em ka khlam COVID-19 da thut bha i rukom pynlait Scheme ka sorkar India. Da e nongmuna u wa ka mang poisa neibynta ka MGNREGS leh da chah pynduna ko, “Wow yachem deiwa khlem em iyi iyi wow yaklam ym em yumut,” da ong u Ronnie.
Discussion about this post