Ka Jowai Municipal Board (JMB) kawa man ka chnat ka sorkar kawa pait ya ka Jowai ha ki kaam wow pynroi ya ka, ha uni u snem da sdang biang i kreh ko wow lai bait mar yoh ko ya u Chairman wa pura yong ka hadien kamwa chiphaw snem.
Ynne ka sngi u MLA ka Jowai heipor wa pynlait u ya ar tylli ki truck kit jhep wa thymme kani ka Board da pyntip u wa neiliang yong oo da jooh lai yachem u wa u montri wa pait ya ka chnat pynroi sor namo Urban Affairs ka jylla heiwa da sakhi wa na ka T. 20 lak wa da jooh yoh, katni da yoh ka Board duna T. 1 klur wei da kyrmen u wa ha ki snem wow wan daw ye u yoh ka Board rap boon ki Scheme pynroi.
Chooh chooh da pyntip u wa katni neiliang ki sahep ka Board da pynkhreh ki wow chna ya ki dooid, ki sarok ha Jowai heiwa da antaad wa i lut u man i kamwa T. 6-7 klur.
Da pyntip u leh wa ka Board da rai ko wow saam da ki tin-jhep rong yirngam wa rong suiñbneiñ (Green & Blue Bins) cha ki manyung ha Jowai khnang wow ye u pynyait ya jar jiar i jhep na kiwa py’ut wa kiwa ym py’ut.
U Wailadmiki da pyntip u leh wa da pynkhreh leh wow pynkylla noh ya ka luti lai-kjat na Wahnangbah (Najan Skur Amwi) napoh yaw hadooh ha yung krehkaam u DC heiwa daw chna noh ka Board da u sarok kari khnang wow pynduna yei khynñia ha Jowai.
