Ka North East Adventist University (NEAU) deiwa kyrchaan ka Meghalaya State Pollution Control Board (MSPCB) da pteiñ ko yei luti wow pynlang pynlum yei jhep wa mih na kani ka skurbah heiwa da wai ya ka Waste Recovery Centre (WRC) kawa tip leh kam ka Material Recovery Facility (MRF), wei da wan wai ya ka da u Dr. G.H. Chyrmang, MFS, Member Secretary ka MSPCB uwa man leh kam u kongsan.
Kam u kongsan da yaroh u ya ka NEAU yeini i lai luti ko wow chimkhia yei jhep neibhah i jhep ha kani ka juk wa katni toh iwa da chem chitom ki bru wow tip kammon u leh ki hadooh ka sorkar leh da chem chitom ko wow yoh thaw noh jhep wei deiwa em kam kani ka WRC da man ko i kyrkhu deiwa ye u pynkhlaad chwa yei jhep wei wow pynemkaam yei jhep wa dang hoi ha kiwi won ki rukom.
Da ong u leh wa ka MSPCB da kyntu ko ya ki 13 tylli ki karkhana pynmih khyndaw-bilat yow pynemkaam da ka Refuse-Derived Fuel (RDF) deiwa thang yei jhep hapoh ki tyndur ka karkhana yong ki.
Ka North East Adventist University deiwa ya krehlang ko waka Society for Urban and Rural Empowerment (SURE), Jowai deiwa kyrchaan ka Swachh Bharat Mission Urban da jooh pynman ki yei pynsñiawthooh yei emkaam wow pynman ya kani ka thaw puræ kawa khooid.
Kani ka skurbah daw man ko leh kawa nyngkong kattu wow pynlang pynlum pyn da ka hi yei jhep deiwa yoh kyrchaan na ka MSPCB wei neiliang u Member Secretary da saam u leh ya ki borti pynlang yow pynkhlaad yei jhep wei da booh u leh ya u mooyurim yow chna noh ya ka WRC deiwa yarap poisa da ka MSPCB.
Neiliang u Dr. H.H. Mohrmen neibynta ka SURE da ong u wa kani u man ko kam ka wow pyrchang nyngkong yow pait kammon u ye u leh hapoh ka imlang sahlang wei yow tip leh kammon u lai chakhmat manda ye u pynman ya kani ka thong kawa jop.
Discussion about this post